А те шарнеда?

А те шарнеда

Тыгай лӱман у проектым тӱҥалын театр Марий Эл ГТРК дене пырля. 16 январьыште калыклан икымше пашам ончаш темлыме. Тиде Н. Айзманын «Кай, кай Йыванлан» пьесыж почеш шындыме тыгаяк лӱман комедий ыле.

Проектын лӱмжак ойла: ме ончышылан кодшо курымысо тӱрлӧ ийлаште шындыме спектакль-влакын видеоверсийыштым ончаш темлена. Нуным шке жапыштыже Марий телевидений возен. Тиде поянлыкым фонд гыч лукташ да Марий театрын эртыме историйжым, тудын сценыштыже модшо уста артист-влакым шарналташ, нунын дене самырык тукымым палдараш кӱлмӧ шонымаш дене шочын у проект.

Эн ончыч репертуарыш 1971 ийыште шындыме, а плёнкыш 1981 ийыште возымо «Кай, кай Йыванлан» спектакльым шындыме. Чуваш автор да Чуваш театр дене вашкылым ыштыме, икте-весын сценыште модмо, пошкудо калыкын посна марий актер-влакын модмыштым поснак кӱкшын аклыме нерген сеанс деч ончыч МАССР-ын сулло артистше Юрий Алексеев каласкален

Кинофильм семын ончымо спектакльыштат посна татыште залыште шинчыше-влак совым кыреныт. Нунын коклаште шукыжо ийготан лийыныт, тугеже еҥ-влак эртыше жапым, йӧратыме артистыштым уэш шарналтеныт. А вет тӱҥ рольым модшо-влак коклаште илышыже икте-кокыт веле кодын.
Февраль тылзыште «Тулар ден тулаче» (Н. Арбан, 1983 ий) спектакльым кинофильм семын тӱшкан ончаш ӱжына

Поделиться ссылкой:

© Шкетан театр - 2020

Top