Ленинградысе А.Островский лӱмеш театр институтым 1954 ийыште тунемын пытарыме деч вара «Корнывожышто» Павлина гыч тӱҥалын Васса Железнова (М.Горький) роль марте Римма Руссинан чонжо гоч 100 наре образ эртен. Васса Железновам шкежат йӧратен да кугу кумылын модмыж нерген палемден. Вет актриса шкеж гаяк кугу кӧргӧ виян ӱдырамашым почын ончыктен.
Руссина характерный рольымат ыштен, отрицательный ден комедийныйымат модын, эпизодысымат шӱкалын огыл. Образым чоҥымо годым пеш шуко тӱрлӧ пӱрымашан ӱдырамашын илышыжым илен эртарен, тудын кӧргӧ чонжым, шонымашыжым умылаш да ончышо деке шукташ тыршен. Лач тиде актрисын усталыкше нерген ойла. Каласаш кӱлеш, С.Чавайнын «Мӱкш отар» спектакльыштыже Клавийын рольжо дене Римма Арсентьевна сценыш 25 ий лектын.
Юмо тудлан кап-кыл моторлыкымат, усталыкымат чаманен огыл. Да тидын дене посна еҥлан огыл, пӱтынь калыклан пӧлекым ыштен. Римма Руссина сцена гоч моторлыкым да порылыкым шарен илаш туныктен. Палемдалт кодеш шкежат кӱкшӧ культуран, кугу кӧргӧ виян ӱдырамаш улмыж дене.
