М.Шкетан лӱмеш театрын коллективше эше ик у спектакль дене куандарыш. Тиде гана Ю.Байгузан «Кресӱдыр» пьесыж почеш тыгаяк лӱман спектакльым режиссер В.Домрачев луктын.
Тиде возышо деке пöртылмым сай семын палемдыман. Юрий Байгуза марий драматургийыш шке жапыштыже ойыртемалтше автор семын пурыш. Тудо эн ончычак моткоч келге шонымашым чылт яндар марий йылме дене каласен моштымыж дене куандарен öрыктарен. Сюжетымат вучыдымын савырен шындаш мастар, «Кресӱдырыштат» тидымак ужына. Мöҥгыжö самырык ӱдырым йöратен модаш кондышо пöръеҥын (Эдуард Яковлев) вучыдымын ватыже (Светлана Строганова) толын лектеш. Кугыза умылтараш шотым муэш – ӱдырым кресӱдырышкыжö савырен шында. Тыге умбакыже сюжет мундыра пӱтыралташ тӱҥалеш. Вашкыде, икшырымын, пышкем деч посна. Пöръеҥ шке суртыштыжо кок вате дене ила. Йӱдлан иктыж денат ик вакшышыш возын омыл манеш. Но самырыкракше мӱшкыр пижме нерген шижтара. Тидат веле огыл, тудо «кресаважланат» йöратыме еҥым (Павел Ефимов) муаш полша. Такше илышыште тыге лийын огеш керт манме шуэш, но пьесым вет комедий манын палемдыме…
Ты паша ойыртемалтше весын денат. Театр труппыш тений ушнышо актер-влаклан рольым пуаш тӱҥалме. Тыге Ӱдырын рольжым ты гана Наталия Алексеева чоҥыш. У актер – сценыште ятыр жап модшо-влаклан тыгак у партнер. Икте-весым шижаш, умылаш тунемман. Кузе шижыт, мутлан, Олег Кузьминых (Ача) ден Маргарита Медикова (Ава).
Нунын лекмышт дене сцене пуйто чоным налеш, тушто илыш шолаш тӱҥалеш. Спектакльым мыняр шукырак модыт, тудо тунар вияҥеш, келгемеш. «Кресӱдыр» денат тыгак лиеш манын шонена.
Тиде пашаште эше ик дебютант уло – Андрей Герасимов. Тудо спектакльыште йоҥгышо мурылан семым возен (шомакын авторжо – Лидия Иксанова).
С. Белкова.
«Марий Эл» газет, 2015 ий 17 ноябрь