Марий АССР-ын сулло артистше (1960).
Мыйын корнемын тӱҥалтышыже
Южгунам, шкендын илыш корнетым шымлен ончалатат, арам илыме огыл мо, чын корно дене кайыме мо, манын шоналтет.
Мемнан элыштына пашам ышташ сай. Мыланна тидым эн демократический Конституций пуэн. Кажне пашалан лӱдде гына пиж. Иктаж-могай кугу паша нерген шонет гын, тыйын шонымашет шукталтеш. Тидлан уло кумыл дене тыршаш да пашам виян ышташ гына кӱлеш.
Советский калыклан чыла корнат почылтын. А 1917 ийысе революций деч ончыч тудын илышыже могай неле ыле. Мутлан, мыйын кочам, нужна кресаньык, изиж годсекак поян-влаклан пашам ыштен илен.
Мый шым ияш ача-ава деч посна кодым. Советский элыште ом иле ыле гын, мый денем мо лиеш ыле, омат пале. Очыни, шужен, йӧсланен, эрласе кечым кузе илен эртарыме нерген шонен илаш перна ыле. Но мыйын илышем вес семын кайыш. 1945 ийыште мый Сотнурский средний школым тунем пытарышым. Кушко тунемаш каяш, кӧ лияш?– мыйын ончыланем тыгай йодыш шогале. Тыште мыланем еҥым умылен моштышо тыглай еҥ-влак полшышт: нуно мыйын актерлан келшен толмем шижын налыныт.
1944 ийыште, эше школышто тунеммем годымак, мый шкемын йолташем-влак дене Йошкар-Олаш художественный самодеятельностьын республиканский смотрышкыжо толынна. Мый Маргостеатрын сценыштыже первый гана шкемын йолташем Венедикт Пузырьков (кызыт тудо инженер) дене ик актан «Баллада о солдате» пьесыште модмым сайын шарнем.
Концерт деч вара вигак мемнан деке театрын художественный руководительже Володарский йолташ мийын да мемнам кум ий тунемме театральный студиеш кодаш йодо. Идалык гыч мый тудын тунемшыже лийым. Сайракын тунемше-влакым Маргостеатрын спектакльлаштыже модыктат ыле. Мый первый гана «Молодая гвардия» пьесыште Туркеничын рольжым модынам.
Студийым пытарымеке, 1947 ий гыч мый Маргостеатрыште актерлан пашам ышташ тӱҥальыч.
1950 ийыште самырык актер-влакын группышт дене пырля мыйым Островский лӱмеш Ленинградский театральный институтыш тунемаш колтышт. Мыланна театральный искусствын эн сай мастерже-влак де тунемаш логалын. Ныл ий эртымеке, ме шкенан родной театрыш пӧртылна. Ленинград гыч пӧртылмеке, мый Николаевын «Салика» ден «Айвика» спектакльлаштышт, Шиллерын «Йӧратымаш да осал чоялык» да моло спектакльлаштат модынам.
СССР Конституций кечылан театр марий зритель-влаклан Островскийын «Кӱдычан йӱр» пьесыжым ямдылен. тушто тӱҥжым самырык артист-влак модыт. Мый Борисын рольжым йӧратен да кугу интерес дене ямдыленам.
Кажне советский айдемылан кумда корным пуышо партий ден правительствылан кугу таум ыштем.
В.Зернов,
М.Шкетан лӱмеш Маргостеатрын артистше.
«Рвезе коммунист», 1955 ий, 4 декабрь.
{phocagallery view=category|categoryid=65|limitstart=0|limitcount=0}