Легендыш савырныше Атлантида семынак Биармий лӱман эл деч нимогай кыша кодын огыл. Тудын нерген норвег саге ден легендылаште, мифыште гына палемдалтын. Тушто возымылан ӱшанаш гын, тиде финн-угор калык-влакын мландышт лийын кертын. Да тудын поянлыкшым эреак вес калык-влак руалтен налаш тӧченыт.
Тиде миф да легенде негызешак рок-опер шочын. Калыкын этнический ойыртемже дене кылдалтше рок кызытсе театр искусствышто шуэн вашлиялтеш. «Вий-ар – ме» рок-оперыште тачысе музык акрет руна-влак дене иктеш ушалтын. Тидым эн ончычак самырык-влакын умылен кертшашыштым шотыш налын ыштыме. Тиде марий йылме дене йоҥгышо икымше рок-опер, тидын денак ончышын кумылжым савыра.
Оперыште поэтын пӱрымашыже ончыл радамыш лектеш. Тудо эрыкан биарме калыкым темдалаш шонышо конунг (король) Харальд Сур коваште дене пырля йот мландыш толеш. Ю виян биарме ӱдырамашын ӱдыржым йӧратен шындымыж дене илышыже кӱрылтеш. Но каласыме шомакше-влак курымлан илаш кодыт.
Биарме калык шке эрыкшым, шке мландыжым илаш-колаш кредалмаште виян арала. Тудлан Шнуй пушеҥге полша: кече семын шке калыклан шокшым пуа гын, осал тушманым, йӱлатен, ломыжыш савыра. Арамлан огыл ожнак калык ойлен: вийлан эшеат кугурак вий лектеш.
Режиссер-постановщик – Сергей Пронин
Художник-постановщик – Ирина Пронина
Либреттон авторжо – Сеппо Кантерво
Композитор – Владислав Панченко
Марлашке Геннадий Сабанцев-Ояр кусарен
Либреттом Елена Сойнин «Оставайся в Биармии» пьесыж негызеш ыштыме
Премьер 2018 ий 26 апрельыште лийын.
{phocagallery view=category|categoryid=219|limitstart=0|limitcount=0|detail=3|displayname=0|displaydetail=0|displaydownload=0|displaydescription=0|displayimgrating=0}