Васильева Валентина Александровна 1949 ий 10 январьыште У Торъял район, Какшамбал ялеш шочын. 1964 ийыште Кугу Нурмо кандашияш школым тунем пытарен. Тидын деч вара Тошто Торъял кыдалаш школышто шинчымашым поген. 9 классым тунем пытарыме деч вара Марий АССР Культура министерствын направленийже почеш Горький оласе театр училищыш тунемаш каен. 1969 ий мартыште М. Шкетан лÿмеш Марий кугыжаныш драме театрыш пашам ышташ толын. Тиде ийынак Марий АССР Культура министерство тудым Москвашке, А.В. Луначарский лÿмеш Театр искусство кугыжаныш институтыш, тунемаш колтен.
1974 ий гыч В. Васильева М. Шкетан лÿмеш Марий кугыжаныш драме театрыште актрисылан пашам ыштен.
В. Васильева кöргö вий-куатан актриса, тидым сценыште модмыж годым вигак ужаш лийын. Тидыжак тудлан тÿрлö койыш-шоктышан ÿдырамаш рольым модаш полшен. Тиддеч посна тудо мыскара шотан образ-влакымат чоҥен.
Театрын поро таҥже-влак Сергей Николаевын «Салика» спектакльже гыч Валентина Васильеван Саликажым, Миклай Рыбаковын «Морко сем» драмыж гыч Манюкшым, Сергей Николаевын «Комиссар-влак» драмыж гыч Маринажым, Николай Арбанын «Кеҥеж йÿд» комедийже гыч Тамаражым куанен онченыт, нине героиня-влак дене пырля тургыжланаш, куанаш тараненыт. Мутат уке, моло спектакльыштат В. Васильева шкешотан койыш-шоктышым ончыктен: Константин Коршуновын «Аксар ден Юлавий» драмыштыже Тойвийже, Николай Арбанын «Кем ургызо» комедийыштыже Ойсандраже, Владимир Гуркинын пьесыж почеш «Пошкудо марий – вот марий!» комедийыште Лизаже ойыртемалтше улыт.
Валентина Александровна концерт программылаштат кумылын участвоватлен, кеч-могай мероприятийыштат, зритель-влак дене вашлиймашлаштат ик эн чолга ыле. Театрысе мер пашаштат вуйым шупшын огыл – спорт мероприятийлаште вийжым тергыме дене пырля кап-кылжым шуарен. Чыла тиддеч посна самодеятельный творческий коллектив-влак денат вашлияш жапым муын.
Актриса В.А. Васильевам кызыт мартеат йолташыже-влак веле огыл, театрын поро таҥже-шамыч пагалат да йöратат. «Сулен налме канышыш лектынам гынат, театр деч посна иленжат ом керт»,— манеш кызыт Валентина Александровна.
Актриса Васильева В.А. тыгай роль-влакым чоҥен:
1974.В. Иванов. «Вашпижмаш» / «Схватка» — Няня
1974. С.Николаев. «Комиссарын чапше» / Честь комиссара.– Марина
1974. К. Гольдони. «Вуянче-влак» / «Самодуры» — Феличе
1975. М. Рыбаков. Морко сем / Моркинские напевы. — Манюк
1975. К.Коршунов. Аксар ден Юлавий / Аксар и Юлавий. — Элака
1976. М.Горький. Васса Железнова.– Рашель
1976. С.Николаев. Салика.– Салика, Эчан вате
Н. Арбан. «Кеҥеж йӱд» / «Летняя ночь» — Тамара
1977. З.Каткова. А вуй ӱмбалне яндар кава.– Светлана
1978. А.Асаев. Ӱжара мурызо / Сердце поэта.– Муркайык
1979. В.Горохов. Кугезе муро /Песня предков. — Пикас
1979. В.Бояринова. Овда. — Сайвий
1980. М.Рыбаков. Чодыра мӱй / Дикий мед. — Саню
1980. А.Волков. Йорга вате / Озорная женщина.– Ирина, Эмма
1981. Т.Миннуллин «Чодыраял Элыксандр» / «Белая ворона». — Эльвира
1981. С.Иванов. «Ольош».– Овач
1981. С.Николаев. «Айвика». — Элавий
1982. К.Коршунов. «Корныеҥ» / Посторонний.– Валентина
1983. Н.Арбан. «Тулар ден тулаче» / Сват и сваха.– Нонна
1983 г. Р. Солнцев «Чолга рвезе» / «Возвращение первого парня».– Галина
1983. А.Волков. «Пиалан шӱдыр» / «Счастливая звезда». — Лида
1984. В.Шекспир. «Лир кугыжа» / Король Лир.– Корделия
1984. Н.Анкилов. «А шӱм алят шарна» /Солдатская вдова. — Проска
1984. В.Регеж-Горохов. «Сулык» / Грех. — Лиля
1985. В. Абукаев-Эмгак. «Ушкал йомын огыл» / Корова не пропала. — Рая
1986. Б. Васильев. «Ӱжара нӧлтмӧ годым» / «А зори здесь тихие». — Бричкина
1987. В. Распутин. «Пытартыш кече» / «Последний срок». — Надя
1989. В. Регеж-Горохов. «Почан шӱдыр» / «Хвост кометы».- Лесавий кува
1989. Н. Игнатьев. «Савик». — Ондри вате
1990. Б. Аппаев. «Еҥгаватылан шыҥалык» / «Как похищают красавиц».- Света
1990. М. Рыбаков. «Мокмыр» /»Похмелье».- Тамара
1991. В. Ткачев. «Илыш—модыш-пеледыш» /»Цветочки-ягодки».- Найдуш
1991. Ф. Буляков. «Ныл кувалан ик сӱан» /»Выходили бабки замуж».- Овдакий
1991. А. Чебанов. «Проска кокай ӱдыржым марлан пуа». — Оляна
1992_В. Регеж-Горохов. «Шӧртньӧ сӱан» / «Золотая свадьба». — Окима
1993. А. Несин. «Ӧндал мыйым, пиктен пушт» / «Убей меня, голубчик». — Диха
1993. А. Кицберг. «Ургызо Ыхк» / «Портной Ыхк». — Ээва
1994. Ю.Байгуза, В. Пектеев. «Окса тул» /»Блеск монет». — Вес ӱдыр, Вӱдӱдыр
1994. Л. Яндаков. «Пусаксолаште томаша» /»Переполох в Пусаксоле». — Клави
1997. К. Коршунов. «Пӱрыдымӧ пӱрымаш» /»Несужденная судьба». — Тарья
1998. Н. Арбан. «Кем ургызо» / «Сапожник». — Ойсандра.
1998. В. Гуркин. «Кнагари тывырдык» / «Прибайкальская кадриль». — Лида
{phocagallery view=category|categoryid=251|limitstart=0|limitcount=0|detail=3|displayname=0|displaydetail=0|displaydownload=0|displaydescription=0|displayimgrating=0}