У директор дене палдарен

М.Шкетан лӱмеш Марий драме театрыште 20 февральыште коллективын тӱшка погынымашыже лийын. Тушто Марий Эл Республикын культур, печать да калык-влакын пашашт шотышто министр Константин Иванов лийын. Константин Анатольевич театрын директоржо Михаил Матвеевым министрын алмаштышыжлан кусарыме нерген увертарен. Молан лачшымак тудын кандидатуржым ойырен налмым рашемден. Культур, печать отрасльыште ятыр ий ыштен, пашам пайдалын виктарен колтымо шотышто у шонымашыже-влак улыт, шкенжын принципиальный позицийжым арален кертеш, тиде мылам пеш келша, палемден министр.
Федерал закон дене келшышын, лишыл жапыште директорын должностьшым налшашлан конкурс увертаралтеш. А кызытеш театрын директоржын сомылжым Эрик Юзыкайн шукташ тӱҥалеш. Эрик Алексеевич кызыт Я.Эшпай лӱмеш Марий кугыжаныш филармонийым вуйлата. 
К.Иванов тыгак Марий Элын калык, Российын сулло артисткыже Маргарита Медиковам 55 ияш лӱмгечыж дене саламлен, пеҥгыде тазалыкым, усталык аланыште сеҥымашым тыланен.
Тыгак театрыш режиссер-постановщик семын Василий Пектеев пӧртылын. Василий Александрович пытартыш 16-17 ий жапыште республик деч ӧрдыжтӧ тӱрлӧ театрыште спектакльым шынден коштын гынат, чонлан лишыл Шкетан театржын вӱршержым эре шижын шогымыж нерген палемден.
А паша, марий манмыла, кӱжгӧ вуча. 2019 ийыште Марий драме театр шкенжын 100 ияш лӱмгечыжым палемдаш тӱҥалеш.