Тыгай лӱман концертыш калыкым вуча М.Шкетан лӱмеш Марий драме театр 14 февральыште
Йӧратымашым курык дене
Таҥастарен кертеш айдеме:
Мыняре кӱшкырак кӱзет,
Тунаре чот кыра шӱмет.
Але:
Йӧратет гын, йӱштӧ телыжат
Чинчын-вунчын пеледеш тылат.
Йӧратет гын, поро мардежшат
Лум йомакым вӱдылал конда.
Марий калыкын йӧратыме поэтше-влак Семен Вишневский ден Зинаида Ермакова семын йӧратымашлан пӧлеклалтше корнылам чыла мутмастарын возымаштыже лыҥак муаш лиеш. Айдемын чоныштыжо шочшо тиде шижмашлан курымла дене умылтарымашым кычалыт да ончыкыжат кычалаш тӱҥалыт. Йӧратымашлан кӧра айдеме тукым ты тӱняште ила. Ийготым палыдыме йӧратымашлан пӧлеклалтын театрын черетан концерт программыжат. Эше ик гана ончалаш темлат артист-влак тӱрлӧ спектакль гыч чоным тарватыше шижмаш дене кылдалтше ужашлам. Посна муро дене пӧртылтат залыште шинчыше-влакым самырык пагытыш. Толза, шарналтыза шӱшпык муран садерыште ӱдыр-рвезе-влакын погынымо верыште модын юарлымыдам, ала-кудыж деке шочшо поснак ныжылге шижмашдам, вожылалын, кид кучен, эҥер сер воктене ошкылал колтымыдам, пырля эр ӱжарам вашлиймыдам…