М.Шкетан лӱмеш драме театрын еҥже-влак Нижний Новгородышто эртыше «Россий театр – XXI курым. У ончалтыш» лӱман театр форумыш каеныт. Тудо 21 апрельыште тӱҥалын, 25 апрель марте шуйна.
Форум тунемме шотан, тудым Театр-влак ушем Юл кундем федерал округысо театр специалист-влаклан эртара. Погынышо-влак сцене паша дене кылдалтше тӱрлӧ мастерскойышто пашам ыштат. Драматический театрын артистше-влаклан, мутлан, сценыште кутырымо, сценыште коштмо шотышто матер-класс-влакым темлат. Художник-влаклан тӱрлӧ могырым шинчымашым пойдараш йӧн ышталтын. Тыгак лӱмын ямдылыме программе темлалтеш.
М.Шкетан театр гыч форумын пашашкыже художественный вуйлатыше В.Пектеев, директор Э.Юзыкайн, тӱҥ режиссер Р.Алексеев, тӱҥ художник С.Таныгин, актер-влак С.Строганова ден А.Иванов ушненыт.