Тудо калык чонышто ила

4 мартыште Марий Эл Республикын сулло артистше Владимир Янгабышевын шочмыжлан — 80 ий.

Владимир Семеновичын уло илышыже М.Шкетан лӱмеш Марий драме театр дене кылдалтын. 1965 ийыште А.В.Луначарский лӱмеш ГИТИС-ым тунемын пытрымекыже, кумло вич ий сценыште модмо жапыште чылаже шӱдӧ утла рольым модын. Яшката капкылан, йытыра шӱргывылышан актерын амплуаже тӱҥалтыш жапыште йӧратен моштышо качымарий лийын. Тыгай коклаште палемдыман «Ачийжат-авийжат» гыч Мичийым, «Кунам ломбо пеледеш» гыч Садовиным, «Ош йӱксӧ» гыч Володя Гордеевым. Вараже утларак келге, драматический рольым ӱшанаш тӱҥалыныт. Ончышо тудым Эчанын («Кӱртньӧ вий»), Аксарын («Аксар ден Юлавий»), Азаматын («Айвика») образыштышт йӧратен ончен…

Кодшо курымысо 70-ше ийла тӱҥалтыште В.Янгабышев МГПИ-н студентше-влак дене пашам ыштен. Режиссер семын «Мӱкш отар» (С.Чавайн), «Эҥер лӱшка» (Д.Ступеля, Ялмарий Йыван марлаҥден), «Комсомол ӱдыр» (Н.Игнатьев), «Кунам ломбо пеледеш» (А.Волков) спектакль-влакым шынден. Тидым шарнен, В.Янгабышевын шочмыжлан 75 ий темме вашеш ончычсо студент-артист- влак «Тылат яндар тӱняште – эн сылне мут…» книгам савыктен луктыныт. Тудым ямдылымаште театр кугун полшен.

Владимир Семеновичын ӱмыржӧ 2004 ийыште кӱрылтын. Но марий калыкын, тидын шотыштак тудын дене пырля ыштыше да тудым палыше актер-влакын чоныштышт да ушыштышт тудо кужу жап илаш тӱҥалеш.