29 сентябрьыште «ВИЙ-АР–МЕ» рок-опер дене театр 99-ше тургымым почын. Тиде кечын эрдене коллектив молгунамсе семынак М.Шкетанын чапкӱжӧ воктек пеледышым пыштен.
— Театрым воштончыш дене таҥастарат, — палемден памятник ончылно мутым ойлымыж годым театрын художественный вуйлатышыже В.Пектеев. – Шкетан лӱмеш театрым марий калыкын воштончышыж дене таҥастараш лиеш. 99 ий ончыч театр шочмо дене марий калыкын сылнымутшо утларак вияҥаш тӱҥалын – сценыште ончыкташ келшыше произведений кӱлын. Марий профессиональный художественный, музыкальный искусство вияҥмаштат театрын верже кугу манаш лиеш.
Кастене спектакль тӱҥалме деч ончыч театрыш толшо-влак Татьяна Хлебникован «Мода школжын» коллекцийже дене палыме лийыныт. Йоча- влак кызытсе жаплан келыштарыме национальный вургемым ончыктеныт. Тыгак художественный училищыште тунемше-влакын сӱретыштым выставкыш чумырымо.
Театр тургымым почмо дене калыкым культур, печать да калык-влакын пашашт шотышто министрын алмаштышыже М.Матвеев саламлен. Тудо таче режиссерын полышкалышыжлан ыштыше Елизавета Ивановалан «Марий Эл Республикысе культурын сулло пашаеҥже» чап лӱмым пуымо нерген увертарен да удостоверений ден оҥеш пыжыктыме знакым кучыктен. Театр лӱм дене тыгак театрын тӱҥ художникше Сергей Таныгиным эртыше 50 ияш лӱмгечыж дене салымлыме.
«ВИЙ-АР–МЕ» рок оперыште ты кастене Харальдын образшым Иван Соловьев чоҥен (тымарте тиде рольым РМЭ-н калык артистше Роман Алексеев модын). Ончышо-влак самырык актерын пашажым сайын акленыт. Тургым почылтын. Ончылно зрительллан поян репертуар темлалтеш. Лишыл жапыште, 6 октябрьыште, С.Чавайнын «Элнет» романже почеш тыгаяк лӱман спектакльын премьерже лиеш. Тудо марий сылнымутын классикше С.Чавайнын шочмыжлан 130 ий теммылан пӧлеклалтеш.
{phocagallery view=category|categoryid=235|limitstart=0|limitcount=0|detail=3|displayname=0|displaydetail=0|displaydownload=0|displaydescription=0|displayimgrating=0}