Таче 90 ияш лӱмгечыжым РСФСР да МАССР искусствын сулло деятельже С.И.Иванов палемда.

Сергей Иванович Иванов

Таче 90 ияш лӱмгечыжым РСФСР да МАССР искусствын сулло деятельже С.И.Иванов палемда. Сергей Иванович 1958-1974 ийлаште М.Шкетан лӱмеш Марий кугыжаныш драматический театрын тӱҥ режиссержо лийын.

С.И.Иванов 1951 ийыште И.С.Палантай лӱмеш музыкально-драматический училищын актер отделенийжым отличиян диплом дене тунемын пытарен. Вигак А.В.Луначарский лӱмеш ГИТИС-ын режиссер факультетышкыже пурен, СССР-ын калык артистше Ю.А.Завадскийын курсыштыжо тунемын. 1956 ийыште вузым тыгак отличиян диплом дене тунемын пытарен да Йошкар-Олашке пӧртылын, Марий драмтеатрыште ончыч черетан режиссерлан ыштен, кок ий гыч тӱҥ режиссерлан шогалтеныт.

С.И.Иванов театрыште витле наре спектакльым шынден. Тудо «Акпатыр» икымше марий оперын режиссержо.

С.И.Ивановын ик эн кугу суапле пашаже семын марий драматургийым вияҥдыме сомылым шотлыман. Самырык режиссерын тунемын толмо жаплан С.Г.Чавайнын поро лӱмжым пӧртылтымӧ. Тыге тудын тыршымыж дене сценыш марий сылнымутын классикшын произведенийже-влак лектыт. Тиде пагытыште шкеныштым драматургий жанрыште К.Коршунов, М.Рыбаков, П.Эсеней, В.Регеж-Горохов, икмыняр моло еҥ тергаш тӱҥалыт. С.Николаев, А.Волков, Н.Арбан у деч у произведенийым театрлан темлат. Тидын годымак театрын репетуарыштыже тӱнямбал да совет классик, иза-шольо калык-влакын произведенийышт шке верыштым налыт. Театр Всесоюзный, Всероссийский фестивальлаште шке мастарлыкшым ончыкта, С.Иванов ден пырля посна актер-влак Диплом дене палемдалтыт.

Лач С.И.Ивановын тӱҥ режиссерлан ыштымыж годым Марий Эл деч ӧрдыж кундемлашке гастроль дене лекме традиций шочеш. Марий театрым Башкирийыште, Урал кундемыште, Свердловский областьыште каҥеж еда кугу уна семын вучаш тӱҥалыт.

С.И.Иванов театрыште пашам ыштымыже, посна актер-влак нерген «Марий театрын мастарже-влак» книгаштыже радамлын каласкален (2016).

1982-1998 ийлаште тудо И.Палантай лӱмеш Марий музыкальный училищын директоржо лийын.

Таче Сергей Иванович шкенжын 90 ияш лӱмгечыжым палемда. М.Шкетан лӱмеш Марий национальный драме театрын тачысе коллективше, тудын ветеранже да театрым йӧратыше чыла еҥ лӱм дене ме Тендам, Сергей Иванович, шокшын-шокшын саламлена. Пеҥгыде тазалыкым, кужу ӱмырым, весела кумылым тыланена. Марий театрым сар деч вара йол ӱмбаке шогалтыме да тудым вияҥдыме суапле сомылдам кӱкшын аклен, ме Тыланда вуйнам савена.