Тӱнямбал театр кече вашеш М.Шкетан лӱмеш Марий национальный драме театрыш куанле увер тольо – театрын тӱҥ режиссержо Роман Алексеевлан Марий Эл Республикым вуйлатыше А.Евстифеевын 2018 ий 19 мартысе 43-шо номеран Указше дене «Марий Эл Республикын калык артистше» почетан лӱмым пуымо.
Роман Алексеев изинек театрыште кушкын: ачаж ден аваже тыште пашам ыштеныт. Сандене ончыкылык профессийым ойырымо годым вуйым утыжым пудыратылаш кӱлын огыл. Школ деч вара вигак Москвасе М.С.Щепкин лӱмеш кӱшыл театр училищыш тунемаш пурен. 1998 ий гыч, ынде коло ий, М.Шкетан лӱмеш театрыште пашам ышта. Тӱҥалтыште тудо актер семын ончаш толшын кумылжым савырен. «Саликаште» Эчукым модын манме денак тиде артистын ончыкыжо могай рольым ыштымыж нерген тогдаяш лиеш – герой-любовникын. Кугу яшката кап-кылже, тыматле койышыжо, сайын мурымыжо – чылажат сценылан келшыше. Но тӱжвал сын деч посна ты актер эше чоҥымо образышкыже келгын пурымо, шке гыч кычалмыж дене ойыртемалтын. Тидак варажым Роман Алексеевым режиссер профессийыш конден. Кок ий годым актер семын модмо дене пырля режиссерын ассистентшылан ыштымеке, Б.Щукин лӱмеш театр институтысо режиссер факультетыш тунемаш пурен. 2008 ийыште «драме режиссер» специальность дене дипломым налын.
«Улыжат вич кас» (А.Володин, 2008), «Вучо, мане, пєртылам» (В.Гуркин, 2010), «Кугезе муро», ( В.Регеж-Горохов, 2011), «Юмынўдыр» мюзикл (2012), «Морко сем» (М. Рыбаков, 2012), «Монча кечын» (А.Тарасов, 2014), «Осал чоялык да йєратымаш» (Ф.Шиллер, 2016)… Режиссер семын Роман Алексеевын шындыме спектакль-влакым умбакыжат радамлаш лиеш.
Пытартыш ик ийыште гына икмыняр постановкым сценыш луктын. Тиде Н.Арбанын пьесыжым уэмден ямдылыме «Тулар ден тулаче» комедий, марий писатель-классик М.Шкетанын «Эреҥер» романже негызеш тыгаяк лӱман пеҥгыдын негызлыме постановко улыт. «Человек из Подольска» (Д. Данилов) пашаже Йошкар-Оласе самырык-влакым театрыш шупшылаш полшыш.
Ме Роман Юрьевичым ты кугу лӱм дене шокшын саламлена. Усталык пашаштыже у шӱлышым, сымашым, пиалым, тазалыкым тыланена.