Сценыште уэш «Салика»

М.Шкетан лӱмеш Марий национальный драме театр 23 мартыште ончышо-влакым уэш премьерыш ӱжеш. Тиде спектакльже – «Салика». Уста марий драматург С.Николаевын ты пьесыже сценыште латкокымшо гына шындалтеш. Тудын режиссержо – театрын художественный вуйлатышыже, Марий Эл искусствын сулло деятельже Василий Пектеев. Василий Александрович тиде пьесе дене кумшо гана пашам ышта. Тудын таче тӱҥ шонымашыже: Салика ден Эчук чолга улыт, шке йӧратымашышт верч кучедалаш огыт лӱд. Нунылан ялысе тыгаяк чолга ӱдыр-рвезе-влак полшат.
Спектакльын вес ойыртемже – сценыште кайыше действийым «Марий кундем» калык семӱзгар оркестрын шоктымыжо сӧрастара. Сӱан сценыште «Марий памаш» калык ансамбль кушта.
Чыладамат уло кумылын спектакльыш ӱжына.