Спектакль-дневник

Шкетан театр сценыш эше ик у пашам лукто, тиде «Унчышко тулан йолгорно» спектакль. Тудо моло постановко деч ойыртемалтше. Мо дене?

Сценарийым Василий Пектеев (шкежак режиссер семын шынден) дневник негызеш ямдален. Тиде дневникшым Морко район Унчо кундемын ӱдыржӧ Анастасия Федоровна Ласточкина возен. Школ тетрадьыш туныктышо Кугу сар корным эртымыж нерген шарнымашым пыштен. Спектакль Кугу сарыште сеҥымылан 75 ий теммылан пӧлеклалтын.

Анастасия Ласточкинан авторжын рольжым Марий Элын калык артисткыже Светлана Строганова ден самырык актрисе Светлана Александрова модыт. Спектакльым марий семмастар Виталий Шапкинын флейте дене шоктымо семже сӧрастара. Тыгак содержанийым сар дене кылдалтше видеосюжет-влак пойдарат.