19 мартыште М.Шкетан лӱмеш Марий драме театрын сценыштыже Татар академический театрын артистше-влак «Диляфруз – remake» спектакльым модаш тӱҥалыт. Тидын вашеш 6 мартыште Камал театр директорын маркетинг да PR шотышто алмаштышыже Ильшат Латыпов, Татар Республикын сулло, Йошкар-Олашке кондымо спектакльыште модшо артист-влак Алсу Каюмова ден Фанис Зиганшин республикысе СМИ пашаеҥ ден блогер-влаклан пресс-конференцийым эртареныт. Журналист-влакын шуко йодышыштлан уна-влак раш вашмутым пуэныт.
Т.Миннуллинын тиде пьесыже сценыш эн ончыч 1972 ийыште лектын. Тудым кызытат Татарстанысе театр-влак модыт. А Камал театрын йодмыж почеш драматург произведенийым тачысе илышлан келыштарен. Да тудым лач тиде театрыште веле модыт. Ынде мемнан ончышына-влакат мурымашан-куштымашан ты весела комедийым ончен да аклен, шкенан дене таҥастарен кертыт.
Кугу чапым налше, шке калыкшын лӱмжым кӱшкӧ нӧлтышӧ, тӱня мучко гастроль дене коштшо тиде театрым ончаш лийме йӧным кучылтманак.
Спектакль синхронно руш йылмыш кусаралтеш, сандене умылымо шотышто нимогай йодыш уке. Вучена театрыш.