{phocagallery view=category|categoryid=257|limitstart=0|limitcount=0|detail=3|displayname=0|displaydetail=0|displaydownload=0|displaydescription=0|displayimgrating=0}
Тыгай лӱман у ий концерт программым темлышт калыклан Шкетан театрын артистше-влак. Тудо лӱмжым сулыш. Вет спектакль гыч ужаш, муро ден куштымаш-влакым Васли кува-кугызамыт оҥайын ик тичмашыш ушышт. Сценыште пайрем да мыскара шӱлыш озаланыш. Да шуко пӧлек ыле. Ончаш толшо кокла гыч шуко еҥ ты кастене шампан арака кленча, чапле пакетыш вӱдылмӧ пӧлек да театрыш толаш ӱжмаш дене мӧҥгыжӧ кайыш.
Тиде концерт программе дене артист-влак 2018 ийлан сценыш пытартыш гана лектыч. Йӱштӧ кугыза ден Лумӱдыр залыште шинчыше-влаклан пеҥгыде тазалыкым, пашаште сеҥымашым, ешыште пиалым да ваш умылымашым тыланышт. Ме тиде тыланымашке ушнена да манына: у ийыште вашлиймешке! А тудыжо кок кече гыч мемнан деке толынат тӱкалта. Театр гын тыланда шке омсажым 2 январьыштак почеш – Арсий Волковын «Йорга вате» спектакльжым ончаш ӱжеш. Тудо тыгак 3 январьыште лиеш. 4, 5 январьыште «Ӱжында?» весела комедий пайрем шӱлышым умбакыже шуя. А кӧ «Шорыкйол кас» концертыш ала-могай амал дене толын кертын огыл, тудым 7 январьыште ончаш лиеш.
Толза, ончыза, У ий канышдам мемнан дене пырля эртарыза! Пайрем дене!!!