У спектакль-влакым
Василий Пектеев, театрын художественный вуйлатышыже:
— У тургымышто эн ончычак у спектакль-влакым сценыш лукмо нерген ойлена. Октябрь тылзыште гына репертуарыш кок у пашам пуртымо, тиде — «Оскар и Розовая дама» да «Ӱдыр таҥлан сай пелаш». Икымшыжым рушла модына. А Валентин Красногоровын «Три красавицы» пьесыж почеш шындыме спектакльым мемнан кум мотор артисткына-влак Маргарита Медикова, Антонина Антонова да Светлана Филиппова ямдыленыт. Ик пӧръеҥ роль уло…
«FOLKS», «Маринавт-влак» спектакль-влакымат улан шотлаш лиеш, нунын премьерышт кодшо тургым мучаште лийын. «FOLKSым» сентябрь кыдалне К.Тинчурин лӱмеш национальный драматургий Х тӱнямбал фестивальыште ончыктымо, критик-влак тудым кукшын акленыт.
Ноябрьыште кумдан палыме англичан драматург Уильям Шекспирын «Укрощение строптивой» пьесыж почеш «Торешвате» комедийым кок кас почела модаш тӱҥалына. Тудым кок состав ямдылен.
Тыгак рушла да марла «Три сестрицы»/ «Кум ака-шӱжар» йомак йоча ден ача-ава-влакын кумылыштым савыра, шонена. Тудым ятыр сылне муро сӧрастараш тӱҥалеш.
«Вияш эфирым» да Пушкин картым
Эрик Юзыкайн, театрын директоржо:
— У тургымышто Марий Эл деч тораште илыше-влак дене утларак лишыл лийына. Кеч-могай кундемыште еҥ-влак спектакльнам театрыш толшо-влак дене ик жапыште ончен кертыт. Тидым ышташ мыланна «вияш эфир» йӧн полша.
Вес ойыртем: 14-22 ияш самырык-влак мемнан театрыш толаш Пушкин картым кучылт кертыт. Пӱтынь репертуар гыч 90 процент спектакльыш билетым тиде карт дене налаш лиеш.
Кылым ыштыме йӧным
Алексей Рыбаков, театрын программистше:
— Вияш трансляцийым ончышашлан театрын сайтыштыже але «Вконтакте» соцкылысе мемнан лаштыкыштына спектакльым ойырен налын, «купить прямой эфир» кнопкым темдалман. Почылтшо окнаште электрон почтым, телефоным возыман, темлыме условий дене келшыме нерген палым шындыман. Тиддеч вара банк карт гоч ончыктымо наре оксам кусарыман. Билетым спектакль лийме кечын веле огыл, ондакат ышташ лиеш.
Гастрольышто у вашлиймаш-влакым
Елена Гришина, директорын ончышо-влак дене пашам ыштыме шотышто алмаштышыже:
— Сентябрь тылзе мучаште Володя Матвеевын пьесыж почеш шындыме «Ава каПИтАЛ» спектакль дене артист-влак Татарстан кундемыш миен коштыч. Нуным Элнетыште, Буймышто, Кукморышто, Улисъялыште шокшын вашлийыныт. 2 октябрьыште тиде спектакльым Казаньыште модына.
Ноябрь мучаште Башкортостан кундемыш гастроль дене лекташ ямдылалтына. 30 ноябрьыште, 1, 2 декабрьыште Уфаште Академический руш драматический театрын сценыштыже артист-влак «Пампалче», «Окса тул», «Йыван Кырла. Путевка в жизнь» спектакль-влакым модын ончыктат. 3-5 декабрьыште Нефтекамскыште, Калтасаште, Мишканыште, эше икмыняр кугурак яллаште «Ава каПИтАЛ», «Еҥ марий – вот марий!» спектакль-влакым темлена.
Чыла уверым театрын сайтыштыже shketan.ru адрес дене, тыгак соцкылысе лаштыклаште муаш лиеш. Эскерыза, ончыза, йодыш лектеш гын, рашемдыза. Лийза мемнан дене пырля.