Увертарыме «Театральный Йошкар-Ола» черетан фестиваль шеҥгелан кодо. Тиде гана М.Шкетан лӱмеш Марий драме театр кок спектакльым ончаш темлен – тиде М.Шкетанын романже почеш шындыме «Эреҥер» да Н.Арбанын «Тулар ден тулаче» пьесыж почеш тыгаяк лӱман паша (В.Матвеев тачысе кечылан келыштарен). Тыгак жюри член-влак М.Медикован ямдылыме «Без слез не взглянешь» (М.Апраксина) моноспектакль ден «Человек из Подольска» постановкым онченыт.
Фестивальым Тӱнямбал театр кече вашеш, 26 мартыште, иктешлыме. Мемнан коллегына, Марий Элын калык артисткыже Светлана Строганова, Йыван Кырля лӱмеш театр премийым сеҥен налын. «Тулар ден тулаче» спектакльыште модмыжым «Кокымшо планан эн сай ӱдырамаш роль» номинацийыште палемденыт.
Тиде кечын тыгак «Марий Эл Республикын калык артистше» удостоверенийым да оҥеш пыжыктыме знакым театрын тӱҥ режиссержо Роман Алексеевлан, «Марий Эл Республикын сулло артистше» удостоверенийым да оҥеш пыжыктыме знакым Елена Мочаловалан кучыктеныт.
Ме коллегына-влакым кугу сеҥымаш дене уло кумылын саламлена, ончыкыжо усталык пашаштышт у сеҥымашым, у кӱкшытым тыланена.