Шомак – «Красная Гвоздика» тӱнямбал национальный патриотический фестиваль-конкурс нерген. Тений тудын ойырен налме туржо Йошкар-Олаште эртен. Тушко М.Шкетан лӱмеш Марий драме театрын актрисыже Светлана Строгановат ушнен.
— Фестиваль нерген «Ачамын олма садше» муремын ик авторжо, композитор Андрей Герасимов ойлен,- рашемда Светлана. – Тудо кастене, театрыште спектакльым модын, пеш писын культур полатыш миен шуаш кӱлын.
Чолга ӱдырамаш миен шуын да мурен веле огыл, эше солист-влак коклаште сеҥышыш лектын. Тудлан лауреатын дипломжым да ты фестиваль-конкурсын Москваште эртышаш гала-концертышкыже ӱжмашым кучыктеныт. Тыгай пиалже республике гыч тудлан шкетланже шыргыжалын.
28 февральыште Москваште Союз Пӧртысӧ Колонный Залын сценышкыже марий вургем дене лекше Светлана Строгановам калык совым кырен вашлийын. Да, мурен пытарымекыже. тыгакак ужатен. Марла мурым кӧ умылен, шонен кертеш ала-кудыжо. Но муро, сем чон гыч лектеш гын, мо нерген ойлалтмым шомак деч посна шижаш лиеш.
— Тиде семым колмекем, мый Андрей деч мурым ышташ йодынам. Шомакым Надежда Моисеева возен. Но тылеч вара идалык наре жап шкемын шижмашемлан лишемдаш тыршен, тудын дене пашам ыштенам, — ойла Светлана. – Тудым мый тыглай мурен ом керт, кажне гана тудын содержанийжым илен лектам.
Светлана Строганован тыгай кӱкшытан фестивальыш ушнымыжо театрынат лӱмжым нӧлта, шкенжымат пойдараш полша.
