КАВАСЕ АЛАША / Небесный тихоход

МУРСЕМ КОМЕДИЙ 12+
Морко район, Ӱшӱттӱр ял пӱртӱс аланыште.
Билетым налаш

М. Шкетан лӱмеш Марий кугыжаныш драме театр, Морко муниципал район администраций, Россий ДОСААФ-ын Йошкар-Ола аэроклубшо ДОСААФ аэроклубын  90 ияш лӱмгечыжлан пӧлеклалтше кугу авиационный шоум да  пӱртӱс аланыште «Кавасе алаша» спектакльым ончаш темлат.

… Сар пытымеш нимогай ӱдырамаш, нимогай йӧратымаш лийшаш огыл – шке коклаштышт кутырен келшат кум йолташ – кум летчик. Лишыл кечылаште нунылан ӱдырамаш эскадрилий дене вашлияш перна манын палат гын, товатат, тыге огыт товатле ыле. Тысе тале летчик ӱдыр-влак тушманымат лӱдыктеныт. Но тул семын йӱлышӧ шинчашт воктенак улшо шке пӧръеҥ-влакланат оружий дене иктак лийын…

Спектакль Кугу сеҥымашлан 80 ий теммылан пӧлеклалтеш. Сеҥымашым кондымаште йӧратымашынат надырже уло. Лач тидым пеҥгыдемден ойла у постановко.

Шкетан театр «Кавасе алаша» спектакльын «сценыже» 23 августышто Морко район Ӱшӱттӱр кундемыште пӱртӱсыштӧ лиеш. Тиде постановкышто действий тӱҥалтыш гыч мучаш марте кава йымалне эрта. Сандене ужар чодыра помышысо аланыште чылажат утларак ӱшандарышын да оҥайын ончалталтеш, чын лийшым шинчаончыко лишемден конда.