Поро йӱла умбакыже шуйна

М.Шкетан лӱмеш Марий драме театр Казаньыште адак уна лийын. Ончылгоч кутырен келшыме почеш, 26 февральыште марий артист-влак Г.Камал лӱмеш Татар академический театрын сценыштыже Н.Арбанын пьесыж почеш шындыме «Тулар ден тулаче» спектакльым модын ончыктышт.Спектакль тӱҥалме деч ончыч артист-влак фойеште шӱвыр-тӱмыр, лывырге мурен-куштымаш дене погынышо калыкым саламлышт. А залыш пурен шичмеке, сценыш театрын тӱҥ режиссержо Роман Алексеев лекте, театр администрацийлан тауштен, марий вургеман пӧръеҥ курчакым кучыктыш:- «Салика» спектакль дене толмо годым Саликан символжым ончыктышо марий вургеман курчакым пуэнна ыле. Ӱдырын пеленже йӧратыме Эчукшо лийшаш. Озаҥ олаште шуко марий ила. Ӧрдыжтӧ илыме годым, мутат уке, шочмо кундеметын, шочмо йылметын шерге улмыжым эшеат пӱсын шижат. Тидын нергенак палемдышт спектакль деч вара вашлийын мутланыме еҥ-влак. Софья Шарабуева-Осипова, шочынжо Шернур район Шӱдымарий ял гыч, Озаҥ оласе тӱвыра автономийын самырык пӧлкажым вуйлатыше :- Шкетан театрын толмыжлан эре куанена, уло кумылын вучена. Калыкым погаш полшена.Юля Гаврилова, Морко район, Шеҥше села гыч, Озаҥысе «Лай мардеж» ансамбльын участницыже, Казаньысе университетыште тунемше:- Шкетан театрын толмыж годым кажне гана ончаш тыршем. Мюзикл сынан марий спектакльым таче икымше гана ужым. Келшыш чылажат. Музыкыжат сылне, воштылашат уло. Тӱҥжӧ – марий йылме дене мутланымым эше ик гана колышташ йӧн ыле. Шочмо йылме дене эртыше концертыште, спектакльыште чон дене канет. Тачат тыгак лие.Тидын нергенак палемдыш Ольга Бочкарева. Тудат консерваторийыште лийше (тушто пашам ышта) концерт деч вара спектакльыш толын шуаш вашкен. Ӱдыр-влаклан ончышым чумыраш полшымыштлан кугу таум ыштена. Но эшеат кугу тау мутым Тамара Марковалан ойлыман. Татар театрыште администратор-влак эсогыл кӧраненрак палемденыт: «Тендан тыште пеш чот полшышо Тамарада уло, мемнан тыгай еҥна Йошкар-Олаште уке».- Мый шӱдӧ утла еҥжым конденам, — рашемдыш тиде чолга марий чолга ӱдырамаш. – Лишыл палымем, родем, пошкудем-влаклан шкеак билетым конден пуэнам гын, весыштлан йыҥгыртенам да шкешт театрыш толын налыныт.- Тылеч ончыч кондымо «Юмынӱдырымат», «Саликамат, «Оръеҥ мелнамат» онченам. Нуно чыланат икте-весе деч ойыртемалтыт, конешне. Тачысе спектаклят шкешотан ыле. Сценыште сылне сем йоҥга, артист-шамыч пеш сайын мурат, сайын модыт. Мый молгунамсе семынак пеш чот куанен ончышым.Спектакль чынжымак ик шӱлыш дене эртыш. Ты гана залыште шинчыше-влак коклаште шукынжо марий улыт ыле манме шижалте. Тидын нерген посна татлаште я вигак рӱжге воштыл колтымо, я совым кыраш тӱҥалме ойла (кусарышын полшымыж дене умылаш тыршыме годым тыгайже шагалрак лиеш). — Зал гыч поро шӱлыш толмо актерлан модаш полша,- палемдыш мӧҥгеш пӧртылмӧ годым Иван Смирнов. – Конешне, татар-влакын национальный театрышт чапле, сцене кугу. Артист йоҥгыдылыкым шижеш.Артист веле огыл, меат, Марий Эл гыч мийыше-влак, тидым шижна. Мутлан, спектакльым тул полшымо дене сӧрастарыме сӱрет тыште ятырлан сай ыле.Унала мийыме сай. Ынде татар театрын артистше-влакым вашлияш ямдылалтына. Нуно 19 мартыште М.Шкетан лӱмеш театрыш «Диляфруз – remake» весела комедий дене толыт. Совет жапысе пьесым тыгак тачысе кечылан келыштарен модыт. Ончышына зал тич лиеш манын ӱшанена. {phocagallery view=category|categoryid=211|limitstart=0|limitcount=0|detail=3|displayname=0|displaydetail=0|displaydownload=0|displaydescription=0|displayimgrating=0}