Петухов Валентин Иванович 1941 ий 24 майыште Куженер район, Кугу Лаждÿр ялыште шочын.
1965 ийыште Москваште А.В. Луначарский лÿмеш Театральный искусство кугыжаныш институтым тунем пытарымеке, моло дене пырля Шкетан лÿмеш марий кугыжаныш драматический театрын коллективышкыже ушнен.
Тÿҥалтыш жапыштак артист В.Петухов шкенжым уста, шкешотан, мастар актёр семын ончыктен: чонымо образше-влак тудын келге содержаниян лийыныт. Тидлан кöрак калык коклаште кÿчык жапыште палыме лийын.
Театрыш пашаш толмыж деч вара, 1967 ийыште Марий кугыжаныш драматический театрын тунамсе тÿҥ режиссёржо С.Иванов марий драматург Арсий Волковын «Каче-влак» пьесыж почеш спектакльым шындаш пижын. Осяндрын рольжым Валентин Петуховлан ÿшанен пуэн. Спектакльыште Осяндрын йолташыже Тимошкан рольжым Геннадий Копцев модын. Кок мыскараче рвезе рольыштым туге чаплын чоҥышт – тиде спектакль кажне гана аншлаг дене каен.
«Саликаште» Чопайын рольжым модмым ончымекше, пьесын авторжо Сергей Николаев Валентин Петуховлан тыге каласен: «Мый могай Чопайым шонен возенам, тый чылт тугайым модыч». Авторын тыгай акше, мутат уке, артистлан – эн кугу награде, мастарлык кÿкшытыш чоҥешташ шулдыр.
Келге да шуко шöрынан роль – К. Коршуновын «Кÿдырчан ÿжара» пьесыж почеш шындыме спектакль гыч Элыксан. Кö ок шарне «Кеҥеж йÿд» гыч Валентин Петуховын Одоким кугызажым?
Чыла могырымат шергал ончалын каласаш гын, Валентин Петуховлан артист лияшак пÿралтын. Моло рольжат калык ушеш эрелан кодеш: «Ава шÿм» драмыште — Алёша, «Шöртньö сравоч» йомакыште — Базилио пырыс, «Кок озан тарзыштыже» комедийыште — Труффальдино, «Орадеш кодыныт» комедийыште — Ничипор, «Кай, кай, Йыванлан» комедийыште — Йыван да тулеч молат.
Фотошто 1966 ийыште А.Волковын пьесыж почеш шындыме «Каче-влак» комедийыште Осяндрын рольжым модшо артист Валентин Петуховым ужыда. Шымше снимкыште: Валентин Петухов — К.Коршуновын пьесыж почеш «Кÿдырчан ÿжара» спектакльыште Элыксан рольышто.
{phocagallery view=category|categoryid=27|limitstart=0|limitcount=0|detail=3|displayname=0|displaydetail=0|displaydownload=0|displaydescription=0|displayimgrating=0}