2 февральыште «Окса тул» (Ю.Байгуза, В.Пектеев) калык комедий дене режиссер, М.Шкетан лӱмеш Марий кугыжаныш драме театрын художественный вуйлатышыже Васлий Пектеевын спектакльже-влак фестиваль почылтын. Тудо Василия Александровичын 70 ияш лӱмгечыжлан пӧлеклалтын. Тидын нерген сцене гыч театрым вуйлатыше Э.Юзыкайн увертарен.
— Мый пиалан улам, ӱмыр мучко йӧратыме пашам ыштем, шочмо марий йылмем дене мутланем, мурем, — манын лӱмгече оза калык-влак ончылно ойлышыжла.
Фестиваль кум тылзе шуйна. Тиде жапыште репертуарысе моло спектакль дене пырля В.Пектеевын 2018 ий гыч тӱҥалын таче кече марте шындыме лу спектакльым ончаш йӧн лиеш. Тиде «Салика» ден «Элнет», «Югорно» ден «Снегурочка» (рушла да марла), «Тергыше» «Мӱкш отар», «Йӧратымашын акше», тыгак «Золушка» да «Кум ака-шӱжар» йомак-влак улыт.
Фестивальым 28 апрельыште «Шӱдыр лоҥго каваште» кугу концерт программе мучашла. Тушто юбилярын мутшылан возымо муро-влакым театрын артистше-влак йоҥгалтараш тӱҥалыт.
Фестиваль эртыме жапыште фойеште В.Пектеевын илышыжлан да усталык корныжлан пӧлеклалтше фотовыставке дене палыме лияш йӧн уло. Снимке-влакым тӱрлӧ жапыште фотохудожник Валерия Тумбаева ыштен.
