Паклюсева Нина Аркадьевна 1951 ий 18 июльышто Советский район, Кыдал Кодам ялыште шочын.
— Ешыште ныл йоча лийынна: кум эрге да ик ÿдыр,- шарналтен ойлен варарак Нина Аркадьевна.- Ваш-ваш келшен, икте-весыналан полшен иленна. Шольо-шÿжар улмынам кызытат огына мондо.
Йоча жапше У Торъял районысо Семисолаште эртен. Тыштак школыш кошташ тÿҥалын. Кумшо классыште тунеммыж годым танце кружокыш возалтын. Тудо жапыште кажне пайремлан концертым ончыктеныт. Лачак тунам Нина Паклюсева икымше гана сценышке лектын. Кандашымше классыште тунеммыж годым драмкружокыш кошташ тÿҥалын. Тушто тудлан Макс Майнын «Тул вошт» пьесыштыже Валентинан рольжым ÿшанен пуэныт. Икана спектакльым модмашкышт эсогыл пьесын авторжат, Макс Майн, шкежак миен.
— Драмкружокыш коштмо годымак мый артист лияш шонен пыштышым, садлан лу класс деч вара культпросветучилищын (кызыт культура да искусство колледж) театр отделенийышкыже пурышым,- ойла умбакыже Н.Паклюсева.- Тунамак М.Шкетан лÿмеш театрыш массовкыш коштына ыле. Профессиональный сценышке икымше гана 1968 ий 20 ноябрьыште «Салика» спектакльыште массовкышто лектынам. Тунамак тиде театрын тÿҥ режиссёржо Сергей Иванович Иванов мыланем С.Чавайнын «Илыше вÿд» пьесыштыже, эпилогышто изи гына рольым ÿшанен пуыш. Пьесе мучко Степан Иванович Кузьминых модын. Мыйын партнёрем Георгий Максимович Пушкин ыле.
1969 ийыште Москошко, А.В.Луначарский лÿмеш ГИТИС-ыш, погаш тÿҥалыныт. Конкурсым эртыше лучко еҥ коклаште Нина Аркадьевна Паклюсеват лийын. А вич ий гыч тунем толмеке, чылан мöҥган-мöҥгышкышт каналташ каеныт гын, тудо адак М.Шкетан лÿмеш театрыш толын, Н.Арбанын «Кеҥеж йÿд» спектакльже дене республика мучко гастрольыш лектын. Тыштат тудо массовкышто модын.
— Спектакль кайыме годым кулис шеҥгелне актёр-шамычын модмыштым эскерен шогаш йöратенам,- мутшым шуя Нина Аркадьевна.- Икана тыге шогымем годым Юрий Дмитриевич Иванов (Марий республикын сулло артистше) «Катян рольжым ямдыле» манеш. Мый эше ом тошт, лÿдмемла, вожылмемла чучеш. Вара текстым, мурым тунемым да Катюшам модаш тÿҥальым.
Тиддеч вара Н.Паклюсевалан моло рольымат ÿшаненыт: М.Шкетанын «Ачийжат-авийжат» драмыште – Ведеса, М.Рыбаковын «Морко семыштыже» — Верук, Галя, «Мокмыр» фантасмагорийыште – Марпа, С.Никлаевын «Айвикаштыже» — Айвика, Н.Арбанын «У мурыштыжо» — Наташа, Ю.Багузан «Порсын лÿҥгалтышыштыже» — Шоҥго кува, А.Волковын «Оръеҥ мелнаштыже» — Глафира, Ф.Буляковын «Ныл кувалан ик сÿаныштыже» — Васлича. Коло куд ий театрыште пашам ыштыме жапыште Н.Паклюсева шуко рольым чоҥен, тÿҥ ролят ятыр лийын. Уло вийжым театрлан пуэн.
Шке ойлымыж гыч весат оҥай: Пошкырт мландыште шочын-кушшо Рим Паклюсев дене 1977 ийыште ту кундемыште М.Рыбаковын «Морко сем» драмыж дене гастрольышто лиймыж годым вашлийыныт, тудо ийынак сÿаным ыштеныт да вара Башкирийыш кудалыныт. Тушто, а чынжым дене, Нефтекамск олаште, Н.Паклюсева «Строитель» техник полатыште ТЮЗ вуйлатышылан пашам ыштен.
— Ик ий гыч отпуск жапыште, Пеледыш пайрем гутлаште, Марий Элышке толна, тунам мый М.Шкетан лÿмеш театрышке ужаш пурышым,- ойла артистка.- Режиссёр А.С.Николаев мыланем «Нина, утаре. «Ӱжара мурызышко» рольым тунем, актрисына черланен» манеш. Мый писын гына рольыш пурышым да отпускем мучко гастрольышто Татьянам модын коштым. «Мый театр деч посна илен ом керт. А тый, мыйым йöратет гын, пеленем толат, уке гын – уке»,- маньым пелашемлан.
Тыге нуно Йошкар-Олашке пöртылыныт. Н.Паклюсева М.Шкетан лÿмеш Марий кугыжаныш театрыште актрисылан сулен налме канышыш лекмешкыже тыршен.