«Мый улам шийгорнышто…» сылнымут кас

26 октябрьыште  театрын изи залыштыже Марий Элын сулло артистше-влак Алина Егошина ден Елена Мочалова сылнымут касым эртареныт. Тудым  уста марий поэт Зоя Дудинан усталыкшылан пӧлекленыт. Зоя Михайловналан  шукерте огыл «Марий Эл Республикын калык писательже» чап  лӱмым пуымо нерген указ лектын.

Сылнымут касым эртараш шонымаш актрисе-влакын шкеныштын  шочын да тудым моткоч мастарын илышыш шыҥдареныт.  Зоя Дудинан возымо почелемут-влакым  шерын лектыныт да, шканышт могай кӱлешым ойырен налын, ик ярымыш ушеныт. Тӱрлӧ жапыште тӱрлӧ темылан возымо сылынымут корнылажым  поэтын кумылжым шижын лудыныт.  Ик вере автор дене пырля куаненыт, вес вере лишыл еҥ-влакым йомдарымылан кӧра  чон дене шортыныт, кумшо вере шочмо кундемын шокшешыже вӱдалалтыныт, йӧратымашын тулешыже когаргеныт… Чынжымак, почеламутым сцене гыч лудмо годым тудын кӧргӧ содержанийже  утларак почылтеш да лудшо деке тичмашын миен шуэш.

Касым поэтын мутшылан возымо муро-влак сӧрастареныт.

Залыште тиде гана шукыжо Зоя Дудинан йолташыже, палымыже, тудын поэзийжым аклыше-влак лийыныт, кажне почеламутым шокшын вашлийыныт.

Кум еҥын вийышт дене ямдылыме тиде программым верлашке лектын ончыкташ пеш келшен толеш.

Поделиться ссылкой:

© Шкетан театр - 2022

Top