Марий драматург Вячеслав Абукаевын-Эмгакын драмыж почеш «Кайыккомбо кашта» спектакльым ончаш темлена.
Лач тиде каштамак ончен, кайыккомбо-влак шокшо велыш чоҥештылыныт. Ойырленыт гынат, икмыняр жап гыч нуно уэш вашлийыныт. Айдеме илышыштат тыгак вет. Драмын геройжо-влакым Кугу Отечественный сар ойырен. Нунылан кайыккомбо кашта – шарнымаш кыл гаяк.
Авторын премьера деч вара ойлымыж гыч теве мо шарналтеш: тиде драмылан сюжетым телевизор дене кажне арнян ончыкталтше «Жди меня» передача пуэн.
Спектакльыште действий Сайнай ковайын суртыштыжо эрта. Шоналтет да, сар шукертак чарнен, но телепередачыште ончыктымо ик сӱрет ковайым, уныкаже, пошкудыжо-влакым сар жапыш уэш пӧртылта. Сайнай шкежат фронтышто лийын, 50 ий эртымеке, мӱндыр Канада гыч тудым палымыже кычалеш. Вашлиймашышт кузерак эрта? Шарналтат мо ваш, тынар ий эртымеке? Тидым спектакльым ончымеке, раш пален налыда.
Режиссёр – Марий Элын калык артистше Василий Домрачев. Тӱҥ рольышто Российын сулло, Марий Элын калык артисткыже Маргарита Медикова, тыгак Алена Мочалова, Владислав Виногоров, Владимир Васильев да молат модыт.