Эртыше кушкыжмын М.Шкетан лӱмеш Марий кугыжаныш драме театрын ончычсо директоржо, Марий комсомолын Олык Ипай лӱмеш премийжын лауреатше, Марий Эл культурын сулло пашаеҥже, чолга мер пашаеҥ, журналист да поэт Юрий Русановлан Морко район Зеленогорский кыдалаш школ пырдыжеш сакыме Шарнымаш оҥам почмо. Ила гын, тиде кечын, 15 майыште, Юрий Петрович 50 ийым тема ыле. Но тудын ӱмыржӧ кум ий ончыч кӱрылтын.
Марий театрым вуйлатымыж годым Юрий Русанов лӱмлӧ марий артист-влаклан Йошкар-Олаште илыме пӧртешышт, тыгак шочмо кундемешыштат тыгаяк Шарнымаш оҥам сакыме сомылым ик эн тӱҥ паша семын ончен. Тыге тачысе тукымын марий театр историйыште кугу кышам кодышо чапланыше еҥ-влак ончылно мыняр-гынат порысым шуктымылан шотлен. Теве ынде калык чонышто тудын нерген шарнымаш лийме семын шукырак илыже манын, тыгаяк палым ыштыме. Зеленогорский школышто Юрий Русанов 1983-1985 ийлаште тунемын.
Оҥа ӱмбач пӱрдышым школ директор Е.Г.Александрова ден Юрий Петровичын Сергей эргыж да Ксения ӱдыржӧ кораҥдышт. Вара шомакым Марий Элын культур, печать да калык-влакын пашашт шотышто министрын алмаштышыже М.Матвеев, Марий Эл Кугыжаныш Погын председательын алмаштышыже А.Иванов, Морко район администраций вуйлатыше А.Иванов, Марий оньыжа Э.Александров, Марий национальный конгресс вуйлатыше Е.Кузьмин налыныт. Нунын кокла гыч кажныже Юрий Петровичын тӱҥалтыш жапыште журналист, вара культур аланыште тыршыше кугу кӱкшытан специалист, тидын годымак чолга мер пашаеҥ лиймыжым палемденыт.
Шарнымаш пайрем школысо актовый залыште умбакыже шуйнен. Тушто йоча-влак Юрий Русановын почеламутшым сылнын лудыныт, йолташыже-влак шарнен каласкаленыт. Шарнымаш кажныжын – шкенжын. Драматург Геннадий Гордеевын ойлымыжым поснак палемден кодаш кӱлеш. «Илышыште кажне еҥ шкаланже келшыше корным ойырен налеш,- манын Геннадий Филимонович. - Юрий Русанов журналист да поэт семын усталык пашам ойырен кертеш ыле. Тыге лиеш гын, тудын тачысе кечылан келге шонымашан, илышым кумдан авалтыше ик книгаже веле огыл ош тӱням ужеш ыле. Но Юра ойырен нале марий мер илышым. Оргажан, неле корным. Тудын чонжо вургыжеш ыле марий илыш верчын. Тудо умылен, марий-влак иктеш огына чумырго, вийым иктеш огына ушо гын, мемнан ончыкылыкна огеш лий. Тиде пашаже пеш тӱвыргӧ саскам пуыш. Тудо еҥ-влакым шке йырже чумырен моштен. Театрын пашажат тудын ыштыме жапыште утларак воранен, вияҥын кайыш. Юрий Петрович Русановын илыш-корныжо – самырык-влаклан пример. Тидым шоненак, Шарнымаш оҥам школ пырдыжеш сакыме».
Юрий Русанов нерген школышто пырля тунемше, изи годсек сайын палыме еҥ, туныктышо-влак шарнен каласкалышт. Изи Кугунур ял гыч «Ӱшӱт сем» фольклор ансамбль пайремым муро дене сӧрастарыш.
ххх
18 майыште М.Шкетан лӱмеш Марий драме театрын сценыштыже Юрий Русановын шочмыжлан 50 ий теммылан пӧлеклалтше «Айдеме чон – кавасе шӱдыр» кас лиеш. Тыште тудын почеламутшылан возымо мурым Марий Элын калык артистше-влак Светлана Строганова ден Роман Алексеев, Марий Элын сулло артистше-влак Раисия Данилова ден Татьяна Денисова да молат йоҥгалтараш тӱҥалыт. Тыгак Ю.Русановын у книгаже дене палдарат. Концерт 18 шагатлан тӱҥалеш.

Additional information

До празднования 100-летия театра осталось