М.Шкетан лӱмеш Марий драме театр тений май тылзыштат ик спектакль почеш весым калыклан ончаш темла. 8 майыште, мутлан, Вячеслав Абукаев-Эмгакын пьесыж почеш шындыме «Кайыккомбо кашта» спектакльыш ӱжеш. Тудо Кугу Отечественный ден чечня сарлаште лийше еҥ-влакын пӱрымашышт нерген каласкала. Кок тукым: илалше да самырык. Но кок геройжыланат илышын шерыж ден кочыжым лыҥак тамлаш пернен…
А теве Н.Дьяконовын «Свадьба с приданым» пьесыж почеш шындыме «Молан вашлийым тыйым» музыкальный спектакльыште ты гана (15 майыште) артист-влак «Марий кундем» калык семӱзгар оркестрын шоктымыж почеш мураш тӱҥалыт. А тушто муро шуко уло, нуным рушла гыч марлаш шке жапыштыже В.Абукаев-Эмгак пеш мастарын кусарен.
Театр тенийсе тургымым 24 майыште «Салика» музыкальный комедий дене мучашла. Тидлан амалжат уло. Апрель тылзыште ты спектакльын икымше гана сценыш лекмыжлан 80 ий темын. Тиде жапыште тудым латик гана шындыме. А авторжо, лӱмлӧ драматург Сергей Николаевын шочмыжлан 23 мартыште 110 ий темын.
Тиде кастенак ончаш толшо-влакын ойырен налме эн сай актерын лӱмжӧ пале лиеш.

Additional information

До празднования 100-летия театра осталось