{phocagallery view=category|categoryid=277|limitstart=0|limitcount=0|detail=3|displayname=0|displaydetail=0|displaydownload=0|displaydescription=0|displayimgrating=0}
Молгунамсе семынак, тургымым почмо деч ончыч Шкетан театрыште теният СМИ-н еҥже-влаклан пресс-конференций эртен. А тенийсе тургым ойыртемалтше, театрлан 29 ноябрьыште 100 ий темеш! Марий Эл Республикын культур, печать да калык-влакын пашашт шотышто министрын алмаштышыже М.Матвеев, театрын директоржо Э.Юзыкайн, тӱҥ режиссержо Р.Алексеев журналист-влакым лишыл жапыште ыштышаш паша план дене палдареныт, нунын йодышыштлан вашештеныт. А вара реконструкций деч вара уэмше театр мучко экскурсийым эртареныт.
Пресс-конференцийыште теве тыгай йодыш-влак рашемыныт:
— сентябрь кыдалне театр Российысе национальный театр-влакын «Федераций» фестивальыштышт А.Островскийын «Снегурочка» комедийже почеш шындыме «Кӧ кечым пӧртылта» спектакльым ончыктен. Тудо Чечня республикын рӱдолаштыже, Грозныйышто эртен;
— 4 октябрьыште коллектив у театр тургымым да реконструкций деч вара уэмше театрым почеш. Пайрем кас 16.30 шаг. театр ончылно тӱҥалеш. Тудын программыже пеш поян;
— «Изи оласе театр-влак» федерал программе дене келшышын, Шкетан театрлан 2020 ийыште у спектакль-влакым шындаш да оборудованийым налаш окса ойыралтеш;
— 2020 ийыште, Марий Эл Республикылан 100 ий темме ийын, Шкетан театр республикын лӱмжӧ дене элнан рӱдолаштыже, Москваште, да Россий Федераций деч ӧрдыжтӧ выступатлаш тӱҥалеш;
— ноябрь кыдалне Шкетан театрыште национальный драматургий фестиваль лиеш. Тушко республикысе марий театр, тыгак Татарстан, Чуваший да Калмыкий гыч театр коллектив-влак ушнат;
— ноябрь кыдалне самырык драматург-влаклан семинар-лабораторий лиеш;
— 29 ноябрьыште Шкетан театрын 100 ийым темымыжлан пӧлеклалтше кугу пайрем программе темлалтеш;
— «Кугу гастроль» федерал программе дене келшышын, Шкетан театр декабрь тӱҥалтыште Башкортостаныш гастроль дене кая. Уфаште, тыгак ты кундемысе моло ола ден райрӱдылаште «Салика», «Шӧртньӧ лудо», икмыняр моло спектакльым ончыкта;
— октябрь тылзыште репертуарыш иканаште кум премьер спектакльым пуртымо: «Шӧртньӧ лудо» комедий (Ю.Байгуза, В.Пектеев); «Илена-йӱлена» трагикомедий (венгр драматург Чаба Секей); «Уло яллан ик Йогор» комедий (В.Ткачев).
Театрын коллективше шке ончышыжо-влак дене вашлиймашым чон вургыж вуча! Толза, ме тыланда пашам ыштена!