Увертарыме тиде кече теве толын шуын эртенат кайыш. 2 мартыште М.Шкетан лӱмеш Марий драме театрын сценыштыже А.Островскийын пьесыж почеш шындыме «Чын улат – сай, пиалан гын – сайрак» спектакльын премьержым ончышна. Тудым Российын сулло, Марий Элын калык артисткыже Маргарита Медикован 55 ияш лӱмгечыжлан лӱмын шындыме. Лачшымак тиде пьесым ойырен налме шотышто юбиляр ден режиссер Олег Иркабаевын шонымашышт ик семын келшен толын. Мавра Тарасовнан рольжо Медикованлык манмым меат, ончышо-влак, умылышна.- Маргарита Медикован кажне у рольжо – событий! – палемдыш спектакль тӱҥалме деч ончыч лӱмгече дене саламлышыла РМЭ-н культур, печать да калык-влак кокласе паша шотышто министрже Константин Иванов. Ик предложений дене тиде артистын Марий Элысе театр искусство тӱняште налме вержым моткоч раш палемдыме. Маргарита Егоровна гай кугу кӧргӧ виян, шкенжым пӱтынек сценылан пӧлеклыше, кажне рольым модмо годым чоным вошт пунчал лукшо артист шуко огыл да лийынжат ок керт, очыни. Теве тиде ганат ончен шинчышыла тыгай шонымаш эше ик гана пеҥгыдемдалте: Медикован сценыште кажне йолтошкалтышыже, кажне савыртышыже, кажне ончалтышыже да шомакше — ятыр пачаш шоналтен-вискален налын ыштыме. Тыгайыс тудын героиньыже – поян сурт-оралтым кучышо Мавра Тарасовна. Эргыжым (арт.Э.Яковлев) шонымо семын кучен огеш керт гын, уныкажым (арт.М.Воронцова) шотлан толшо качылан марлан пуышашлан чылажымат ышташ ямде. Но пуаҥын, йӱкшен шушо шӱмымат шулыктараш лиеш улмаш – вучыдымын самырык годым йӧратыме еҥ, Сила Ерофеич Грознов (арт. О.Кузьминых), толын лекмеке, ийготым погышо ӱдырамашат «сапшым луштара» — Поликсенам Платонлан (арт.П.Ефимов) марлан пуаш келша. Но тыште такше сапшым Поликесенан няньыже Филицатат (арт.Г.Иванова) сайын шупшкеда: йӧратыше-влаклан икте-весе дене вашлияш амалым да йӧным ыштылеш. Пьесым куштылго от ман, но режиссер ден актер-влак тудым «сорлыклен» кертыныт. Артист-влак чыланак шке образыштым йӧратен чоҥат, ончышым ӱшандарат, воштылаш да ала-мо шотыштыжо шоналташат таратат. Ик шомак дене каласаш гын, тиде – классике произведений, тудо кеч-могай жапыштат шке лудшыжым да ончышыжым муэш.Юбиляр тиде кастене пеледыш аршаш дене вӱдылалтын ыле. Тыге ончыктеныт актрисым йӧратымыштым ончышо, родо-тукмыжо, шочмо Шернур кундемже гыч толшо-влак. Пьесым марлашке Марий Элын калык поэтше Геннадий Сабанцев-Ояр кусарен. Режиссер-постановщик – Россий искусствын сулло деятельже Олег Иркабаев –Этайн; художник-постановщик – Алексей Голубцев; семым Марий Эл искусствын сулло деятельже Вениамин Захаров келыштарен; балетмейстер – Татьяна Алексеева; вургем сӱретче – Зульфия Щербакова. {phocagallery view=category|categoryid=212|limitstart=0|limitcount=0|detail=3|displayname=0|displaydetail=0|displaydownload=0|displaydescription=0|displayimgrating=0}
Лӱмгече лӱмеш – у спектакль
