МАССР-ын сулло артистше (1977)
РСФСР-ын сулло артистше (1989)
Геннадий Романович Копцев 1942 ий 26 октябрьыште Волжский район, Курыктÿр ялыште кресаньык ешеш шочын. Аза улмыж годымак тулыкеш кодын: ачаже 1943 ийыште фронтеш колен. Изиж годымак гармоньым шокташ тунемын. 1960 ийыште Памар кыдалаш школ деч вара А. В. Луначарский лÿмеш Театр искусство кугыжаныш институтыш, Н. Ф. Чефранова ден П. В. Леслин курсышкышт, тунемаш пурен.
1965 ийыште ГИТИС-ым тунем пытарен, М. Шкетан лÿмеш Марий драма театрыш пашаш толын. Ӱмыржö мучко тыште тыршен. Тÿҥалтыш жапыште комедийный роль-влакым модын: шукын шарнат тачысе кече мартеат тудын Тимошкажым (А. Волков, «Каче-влак», 1966). Тиде роль денак Г. Копцев шкешотан, образыш келгын пурен моштышо, геройжын койыш-шоктышыжым раш почын ончыктышо актёр семын ÿшаным шочыктен. Н. Айзманын «Кай, кай Йыванлан» (1971), С. Николаевын «Салика» (1966), М. Шкетанын «Эреҥер» (1967) спектакльлаште Кузякын, Чопайын да Шужышо качын, Немыч Вöдырын рольыштым моткоч ÿшандарышын чоҥен.
Мутат уке, тидын деч вара моткоч шуко роль лийын. Геннадий Романовичын усталыкше да мастарлыкше роль гыч рольыш кушкын толын, кажне гана пÿжвÿд лекмешкак тыршен, калык ончыко образым чоҥен шуктымо роль дене гына лекташ тыршен. Янгелде (С. Николаев, «Айвика», 1962), Карандышев (А. Островский, «Кузыкдымо ÿдыр», 1968), Осып (М. Шкетан, «Ачийжат-авийжат», 1972), Лазар Семон (Н. Лекайн, «Кÿртньö вий», 1971) Прохор Храпов (М.Горький «Васса Железнова», 1976), Сиплый (Вс.Вишневский, «Оптимистический трагедий», 1980), Шут (В.Шекспир, «Лир кугыжа», 1984), Стенли Ковальский (Т.Уильямс, «Языкан йÿд», 1992), Иван Павлович Яичница (Н.Гоголь, «Каче пазар», 1994) да моло геройжат кугурак ийготан ончышо-влакын тачат шинча ончылныштак.
Тыршымыжым, пашажым, мастарлыкшым кÿкшын аклен, 1977 ийыште Г. Копцевлан «Марий АССР-ын сулло артистше» почётан лÿмым пуымо.
Жаплан келшыше образым Г. Копцев раш умылен моштен да нуным моткоч мастарын почын пуэн. Тыгай-влак коклаште Т. Минуллинын «Чодыраял Элыксандр» (1981), И. Друцен «Илыш сескем» (1982), О. Иосселианин «Орва кумыкталтын» (1985), А. Гельманын «Пиалем, ит кодо!..» (1988) спектакльлаште Элыксандрын, Михай Груян, Дурмишханын, Пöръеҥын рольыштым ончыктыман.
Марий драматург-влакын произведенийлашт почеш шындыме спектакльлаштат Г. Копцевын талантше кумдан почылтын. К. Коршуновын «Кÿдырчан ÿжара» (1977) спектакльыште купеч Фёдор Головановын неле койыш-шоктышыжым моткоч устан модын ончыктен. А теве Миклай Рыбаковын «Венгр рапсодий» (1983) спектакльыштыже Истак Миклайын образше гоч совет айдемын кöргö вий-куатшым, поро чонан улмыжым почын пуэн. Сергей Чавайнын «Акпатырыштыже» (1987) калык восстанийым вуйлатыше ваштареш Г. Копцевын модмо староста Пекеш Сави тавадаҥ шогалеш. Калыкын уш-акылжым, чоялыкым, тÿрлö йöным муын моштымо мастарлыкым Н. Игнатьевын «Савик» романже почеш шындыме тыгаяк лÿман спектакльыште (1989) Геннадий Романович ончышо-влаклан эше ик гана мастарын ушештарен. Тиддеч посна тÿрлö койыш-шоктышан образым чоҥаш пернен Г. Копцевлан актёр пашаштыже: Одоким (Н. Арбан, «Кеҥеж йÿд», 1973), Тукманов (Н. Арбан, «Тулар ден тулаче», 1983), Иявуй (М, Рыбаков, «Онарын кердыже», 1989), Байгузин (М. Рыбаков, «Мокмыр», 1990), Тоймар (М. Рыбаков, «Тÿрлемÿдыр», 1991), молат.
Профессионал мастарлыкше, драмым раш умылен моштымыжо, образым чын почын пуаш тыршымыже Г. Копцевлан пашаштыже моткоч полшеныт.
1989 ийыште Г.Копцевлан «РСФСР-ын сулло артистше» почётан лÿмым пуымо.
Кодшо курымын 90-шо ийлаштыже Геннадий Романович актёр семын веле огыл, тыгак режиссёр семынат мастарлыкшым шуарен. Театр сценыш турко драматург А. Несинын пьесыж почеш «Ӧндал мыйым, пиктен пушт» (1993) спектакльым луктын.
Кужу жап Марий радиошто тыршен: марий автор-влакын произведенийлашт почеш ятыр радиоинсценировкым шынден, калыкын йöратыме «Поро кас!» радиопередачым 20 ий утла вÿден. Марий радион Шöртньö фондыштыжо Геннадий Копцевын йÿкшö дене возымо шуко ойлымаш, почеламут аралалтыт. Мурым возышо автор семынат палыме, тачат йöратен мура калык тудын «Эрвел лыве», «Продавщица», «Ит мужед, таҥем» да моло мурыжымат.
Г. Копцевлан Ю. Байгузан «Порсын лÿҥгалтыш» (1992) трагедийже почеш ямдылыме спектакльыште Пöръеҥын рольжо пытартыш лийын. Тиде образ гоч актёр пеҥгыде, чоя койыш-шоктышан, калык ден кÿшыл кучем коклаште шогышо пöръеҥым моткоч сайын ончыктен, образым мастарын почын пуэн.
Г.Р.Копцевын ÿмыржє 1994 ий 28 сентябрьыште трагически кÿрылтын.
Илышыже да творчествыж нерген возеныт:
Петухов В. Мастарлыкыш ошкыл // Марий коммуна. 1969 ий, 30 март.
Георгина М.А. Спектакли по переводным пьесам в современном марийском репертуаре // Вопросы марийского фольклора и искусства. Йошкар-Ола, 1977. С.74—90.
Ефимова Н. Звезда мечты // Марийская правда. 1984. 1 мая.
Копцев Г. Парыман улам // Марий коммуна. 1990. 1 янв.
Мокеева А. «Сай илышлан ÿшанем» // Кугарня. 1992. 2 май.
Юдин В. «Мый пиалан улам» // Марий Эл. 1992. 14 нояб.
Регеж-Горохов В. Щедрый дар // Марийская правда. 1992. 14 нояб.
Семёнов В. «Тушманем шуко погынен да, шуктем мо?» // Кугарня. 1994. 7 окт.
Реквием // Кугарня. 1994. 7 окт.
Ефимова Н. Памяти актёра // Марийская правда. 1994. 26 окт.
Белкова С. Илыш ÿмыржат пеш кужу, шонышым… // Марий Эл. 1995. 3 окт.
Русанов Ю. Юмо суд деч садак от утло // Кугарня. 1995. 20 окт.
Бирючева О. «Прошу помиловать»: Криминальное чтиво // Марийская правда. 1997. 22 марта.
Семёнов В. Улат тый чоныштына // Кугарня. 1997. 26 сент.
Лобанов И. Рольжо-влак гоч мемнам илаш туныктен // Кугарня. 1997. 26 сент.
Русанов Ю. «Кöранымашым чонышто ашнен огыл…» // Марий Эл. 1999. 28 сент.
Регеж-Горохов В. Марий Никулин, марий де Фюнес // Марий Эл. 2002. 25 окт.
Белкова С. Ӱмыржым ыштыме паша шуя // Марий Эл. 2002. 3 дек.
Константинова Г. Просто большой артист // Марийская правда. 2002. 7 дек.
Петрова Н. Тале артистым порын шарнат // Юл увер. 2002. 28 ноябрь.
Лобанов И. Калык Копцевым ончаш вашкен, а таче?.. // Марий Эл. 2002. 13 апр.
Соловьёва Г. Кече гай волгалтын, пеленна ила // Марий Эл. 2003. 18 янв.
Семёнов В. Шылтален, тунамак туныктен, полшен // Марий Эл. 2009. 24 окт.
{phocagallery view=category|categoryid=71|limitstart=0|limitcount=0|detail=3|displayname=0|displaydetail=0|displaydownload=0|displaydescription=0|displayimgrating=0}