Коллегынам — кугу сеҥымаш дене

М.Шкетан лӱмеш Марий кугыжаныш драме театрын тӱҥ художникше Сергей Таныгин «Золотая маска» Российысе национальный театр премийын лауреатше лийын. Тыге акленыт тудын шукерте огыл эртыше тыгаяк лӱман фестивальыште ончыктымо «Йӱд орол» (Республикысе Курчак театр) спектакльыште художник семын ыштыме пашажым. Тиде премий театр искусствышто моткоч авторитетныйлан да престижныйлан шотлалтеш. Марий Элын сулло художникше С.Таныгин тыгай сеҥымашке ошкыл почеш ошкылым ыштен толын. Герасимов лӱмеш Всероссийский кугыжаныш кинематографий институтым тунемын пытарыме деч вара (1993) тудын тӱҥ пашаже эре театрыште лийын. Кум ий Самырык театрыште ыштен, а вара Шкетан театрыш куснен. Таче марте пеш шуко спектакльым художник семын сӧрастарен. Икмыняр гана Йыван Кырла лӱмеш театр премийын лауреатше лийын. 2009 ийыште «Ачийжат-авийжат» спектакльлан Марий Эл Республикын М.Шкетан лӱмеш кугыжаныш премийже дене палемдалтын. «Ачийжат-авийжат, «Кугэрге» (2012), «Юмынӱдыр» (2013) «Театральный Йошкар-Ола» фестивальыште Гран-прим сеҥен налыныт гын, тыште художник Сергей Таныгинынат надырже кугу. Тыгай уста айдеме лачшымак мемнан театрыште ышта манын, ме моткочак кугешнена. Сергей Ивановичлан ончыкыжат оҥай паша-влакым, сеҥымашым тыланена.