Калык чонышто тачат ила

копцев геннадий романович

Ила гын,  таче, 26 октябрьыште,  РСФСР-ын сулло артистше Геннадий Копцев 80 ияш лӱмгечыжым палемда ыле. Но эше 1994 ийыштак осал да шакше еҥ марий калыкын йӧратыме артистшын ӱмыржым лугыч ыштен.

Геннадий Копцев сценыште эн ончычак комический рольым устан модмыж дене кумылым савырен. Арамлан огыл тудым марий Никулин манын лӱмденыт. Марий ГТРК-н архивыштыже аралалт кодшо да интернет ресурсыш пыштыме тудын модмо икмыняр спектакльым кызытат  ончет да умылет: тыгай мастар артист чынжымак курымлан икте шочеш.

Марий театрыште 1965 — 1994 ийлаште ыштыме жапыште  Г.Копцев 70 наре рольым чоҥен. Нуно тӱрлӧ планан улыт.  Шкенжым тыгак  режиссер семын ончыктен. «Ӧндал мыйым, пиктен пушт» спектакльым шынден.

Г.Копцев  Марий радиошто коло ий утла калыкын йӧратыме «Поро кас» передачым вӱден,  радион шӧртньӧ фондыштыжо тудын йӱкшӧ дене возымо шуко ойлымаш, почеламут аралалтыт. Тыгак шкежат сылнымутан произведений-влакым возен. Шукыракше – мыскара ойлымашым.  Артист йолташыже Василий Горохов дене пырля «Эрвел лыве», «Ит мужед, таҥем» мурым возеныт. «Ломбо» мурылан мутымат,  семымат шке возен.

Мастар артистын лӱмжӧ тачат калык чонышто ила. Тудым палыше кажне еҥын – шке шарнымашыже, спектакльысе шке образше.

Г.Копцевын  илыш-корныжо да усталык пашаж нерген материалым «Геннадий Копцев – марий Никулин. Мондалтыдме корно»  сборникыш чумырымо (2012 ий). Тыгак Шкетан театрын сайтыштыже  лудаш лиеш.

Поделиться ссылкой:

© Шкетан театр - 2022

Top