Йогор кугу сценыш лектын

{phocagallery view=category|categoryid=276|limitstart=0|limitcount=0|detail=3|displayname=0|displaydetail=0|displaydownload=0|displaydescription=0|displayimgrating=0}

М.Шкетан лӱмеш театрын сценышкыже эше ик у паша лекте. «Уло яллан ик Йогор» спектакльым белорус драматург В.Ткачевын «Без Егора будет горе» пьесыж почеш шындыме. 25, 26 октябрьыште тудо калыкым залыш шыҥ-шыҥ погыш. Тидлан ӧршаш уке. Тымарте тиде пашам районлаште ончыктымо. Еҥ-влак тудым пеш сайын вашлийыныт. Тидын нерген икте-весылан ойлымышт, соцсетьлаште палемден кодымышт рекламе шотеш лийын.
Тӱжвач ончымаште, сюжет пеш простала чучеш. Илат ялыште кум шоҥгыеҥ. Нун шкештат, зал гыч ончен шинчыше-влакат умылат: нуно каен колтат гын, мландӱмбач эше ик ял ӱштылалтеш. А ял – тиде чон, мландын, айдеме тукымын чонжо. Икте почеш вес ял пытыме дене порылык, икте-весылан полшымо, ваш умылымо койыш пытен толеш.
Спектакльысе герой-влакын: ондак тӱшка пашам тыршен ыштыше Йогорын, Лизан (тудым Окрошко манын лӱмденыт), ончычсо туныктышо Павловнан ешышт лийын. Пелашышт ты тӱня гыч каеныт, а икшывышт… А икшывышт? Кеч аваштлан кушто улмышт, илыше улмышт нерген шижтарышт ыле. Калык арамлан огыл ожнак ойлен: ава чон шочшо пелен, шочшо чон кӱ пелен. Йогорын, Лизан эргышт нерген шарнен да чон шортын ойлымышт годым залыште шинчыше-влакат, векат, шоналтат: а мыйже ача-авам нерген монден омыл дыр?
Икманаш, спектакль чоным савыралеш, шонкалаш тарата. Кок шагат наре сценыште мо ышталтмым ончымо годым чон канен воштылаш ситыше верат уло, шинчавӱдат ик гана веле огыл толеш.
Ты спектакль театрын ик актрисыжым почо, манаш лиеш. Ирина Кубекова але марте шукыжо эпизод шотан рольыш веле лектын ыле. А тыште Лиза-Окрошкын образшым моткоч чаплын почын пуыш.
Спектакльым режиссер В.Домрачев шынден, художник – С.Таныгин, музык дене С.Пчелкин сӧрастарен. Пьесым марий йылмыш С.Белкова кусарен.