Илья Россыгиным пырля шарналтенна

15 сентябрьыште М.Шкетан лӱмеш Марий драме театрын артистше-влак Шернур район Кукнур кундемыште лийыныт, калыклан концерт программым ончаш темленыт. Тудо тысе Кугу Пӱнчер ялын шочшыжо, Марий АССР-ын калык артистше Илья Россыгиным шарнымашлан пӧлеклалтын. 24 июльышто Илья Ивановичын шочмыжлан 100 ий темын. (Кеҥежым ты жапыште артист-влакын канымыштлан кӧра ты мероприятийым шыжылан кодымо.)

Марий театр искусствын историйышкыже шӧртньӧ буква дене возалтше тиде актерлан 75 ияш лӱмгечыжым палемдыме годым шочмо ялыштыже театр Шарнымаш оҥам сакен ыле. Тунам тыште кугу пайрем эртаралтын ыле. Шарнымаш оҥам тыгак Кукнур тӱвыра пӧртын пырдыжышкыже сакыме.

Таче театрыште пашам ыштыше-влак коклаште Илья Ивановичым шкенжымак ужшо уке. Но тудын пашаже, шкеж нерген шарнымаш ик тукымын весылан каласкалыме гыч куснен толын да тачат актер-влак коклаште ила. Икмыняр оҥай сӱретшым концерт программым вӱдымыж годым РФ-н сулло, Марий Элын калык артистше Олег Кузьминых сцене гычат ойлен ончыктыш.

А тӱҥалтыште комедий рольышто чапланыше актер И.Россыгинын модмо роль дене палдарыше фотографий-влакым ончалаш, тудын йӱкшым мыскара ойлымашым лудмаште, муро гоч колышташ йӧн ыле. Паша корныж дене кӱчыкын театрын художественный вуйлатышыже Марий Эл искусствын сулло деятельже Василий Пектеев палдарыш. Василий Александрович, артист-влакын муро-куштымашыштым ончен, шкеж манмыла, чытен ыш керт, калыклан «Канде ӱжараште» (мушо шкенжын, семже Т.Ямбердован) мурым пӧлеклыш.

Тичмаш налмаште, программе пеш сайын чоҥалтын ыле. Тушто адакат И.Россыгинын модмо роль-влакым шарналташ йӧн ыле. Мутлан, «Салика» гыч Терейым Марий Элын сулло артистше РФ- сулло артистше М.Медикова дене пырля (Эчан вате) пеш сайын келыыштарыш. «Кеҥеж йӱдыштӧ» нине кок артист деке О.Кузьминых ушныш. Ты спектакльыште Илья Иванович Одоким кумым модын.

Калык профессиональный артист-влакым пеш шокшын вашлийын. Совым кырен, рӱж воштылмо йӱк торашке йоҥген. (И.Россыгин нерген кумданрак сайтысе «Ветеран-влак» рубрикыште лудаш лиеш).

{phocagallery view=category|categoryid=226|limitstart=0|limitcount=0|detail=3|displayname=0|displaydetail=0|displaydownload=0|displaydescription=0|displayimgrating=0}