Апрель тӱҥалтыште театрын артистше-влак мӱндыр родына-влак деке гастроль дене миен коштыныт. Нунын корнышт Пошкырт кундемысе Бирск, Нефтекамск олала, Мишкан, Кайраково, Калтаса, Краснохолмск селала гоч эртен. Умбакыже нуным Свердловск областьыште вученыт. Изи Тавра, Арти, Курки селала деч вара Екатеринбург олаште илыше марий-влак куанен вашлийыныт. Ты гана М.Шкетан лӱмеш Марий драме театр самырык-влаклан «Человек из Подольска» (Д.Данилов) да татар драматург З.Хакимын пьесыж почеш шындыме «Ӱжында?» спектакльым ончаш темленыт.
Гастроль театрын 100 ияш лӱмгечыжлан пӧлеклалтын. Тудым 2019 ий 29 ноябрьыште палемдаш тӱҥалына.
