Драме театр рок-оперым шында

Тидлан южыжо огешат ӱшане, очыни. Но тиде чынак тыге. Кызыт М.Шкетан лӱмеш Марий драме театрын актержо-влак «Вий-ар – ме» рок-опер дене пашам ыштат. Тыге марлаҥден «Биармий» шомакым кусарыше семын тыршыше Геннадий Сабанцев- Ояр. Тудым шындаш театр тӱняште сайын палыме драматург, поэт, сценарист, Карелий Республикысе национальный театрын художественный вуйлатышыже С.Пронин темлен. Тудак режиссер семын тырша. Негызлан Е.Сойнин «Оставайся в Биармии» пьесыжым налме. Либреттым Сергей Сергеевич шкеже ыштен.
Мо тыгай Биармий? Норвег сагылаште тыгай лӱман эл нерген ойлалтеш. Тудо Белое теҥыз деч тӱҥалын Урал курык марте шарлен возын улмаш. Тыште финн-угор калык-влак иленыт манын шотлат. Иленыт улан, шуко шӧртньышт лийын. Тиде шӧртньылан верч викинг-влак дене тале вашпижмаш лийын. Но Биармийым сеҥен кертын огытыл, тыште илыше-влаклан шнуй пушеҥге полшен. Тидак возын «Биармий» рок-оперын сюжет корнышкыжо.
А молан лачак тиде произведений да Марий национальный драме театр?
Тиде йодышлан Сергей Сергеевич тыгайрак вашмутым пуыш:
— Эн ончычак, тиде финн-угор калык-влакын историйышт дене кылдалтше теме. Тиде оперым шындаш куштылго огыл: шуко пӧръеҥ актер кӱлеш. Нуно драматически сайын рольым чоҥен, тидын годымак сайын мурен кертышт. Чыла тидыже Шкетан лӱмеш драме театрыште уло.
Мемнан актер-влак труппылан сайым акым пуат – тидыже куандара. А паша кузе каен шога – тидын нерген ме жапын-жапын увертараш тӱҥалына.

{phocagallery view=category|categoryid=204|limitstart=0|limitcount=0|detail=3|displayname=0|displaydetail=0|displaydownload=0|displaydescription=0|displayimgrating=0}