Антонова Антонина Алексеевна

Марий Элын сулло артисткыже (1998)
Марий Элын калык артисткыже (2009)

 

1962 ий 31 январьыште Марий Турек район, Толтенур ялыште шочын. Йоча жапше Медведево район, Ошÿргö ялыште эртен.
1980 ийыште Руэм кыдалаш школым тунем пытарымек, А.В.Луначарский лÿмеш Театр искусство кугыжаныш институтын актер отделенийышкыже пурен — III национальный студийым тунам ты вузышто РФ-ын калык артистше П.О.Хомский вуйлатен. 
ГИТИС-ым тунем тунем пытарымек, М.Шкетан лÿмеш кугыжаныш драматический театрыш пашаш толын.
Коло куд ий чоло жапыште А.Антонова тÿрлö койыш-шоктышан ÿдырамашын рольжым модын. Южыжо поро кумылан улыт гын, икмынярже чаманыме кумылым луктыт. Тыгай улыт, мутлан, тудын Саликаже (С.Николаев, «Салика», 1988), Соня Гурвичше (Б.Васильев, «Ӱжара нöлтмö годым», 1986), Элисаже (К.Коршунов, «Шарнет, Элиса?», 1987), Лизаже (Л.Яндаков, «Тулык ава», 1989) да молат. Актриса эсогыл рвезын образшымат лÿдде, мастарын чоҥен: «Оза вате» спектакльыште (1986) Санюм ÿдырамаш модеш манын, шагалже умылен шуктен докан. Поснак ойыртемалтын модын тудо Эрвикам (М.Рыбаков, «Онарын кердыже», 1989), Мариям (А.Камю, «Йоҥылыш», 1995), Юнайым (Ю.Байгуза, «Поргем ÿмбалне ÿжара», 1998) да молымат.
А.Антонован творческий биографийыштыже пале кышам коден Марина – талантан, кызытсе жапыште моло деч ойыртемалтше ÿдырамаш. А.Иванован «Арале мыйым, волгыдо Юмем!» (1996) поэтический драмыште актриса почеламутым сылнын лудын моштымыж дене веле огыл, тыгак кажне шомакшым шÿм-чон вошт колтен кертмыжым, мурын кажне шомакшым раш умылен сеҥымыжым тÿрыс почын пуэн.
А.Антонова воштылтышан (комический) роль-влакым устан чоҥен. Тудын Галяжым (А.Чебанов, «Проска кокай ÿдыржым марлан пуа», 1991), Тоняжым (А.Волков, «Оръеҥ мелна», 1991), Чачукшым (Л.Яндаков, Пусаксолаште томаша», 1994), Верушыжым (М.Рыбаков, «Тÿрлемÿдыр», 1991), Онисажым (Ш.Башбеков, «Кум кечылан у кува», 2003), Терей ватыжым (С.Николаев, «Салика», 2004) да моло героиньыжымат ужын, ончышо ик еҥат воштылде ок чыте. Драма кумылан роль-шамычыштат: Негина (А.Н.Островский, «Сонарзе ден суксо», 1990), Куллерво шÿжар («Калевала», 1997) да молыштат — актриса героиньыжын илышыж денак «ила». 
1990 ийыште, театрыште пашам ыштыме гутлаштак, А.Антонова И.С.Палантай лÿмеш Музыкальный училищын вокал отделенийжым (педагогшо – Ф.Олейникова) тунем лектын.
Антонина Антонован пашажым кÿкшын аклыме – 1998 ийыште «Марий Эл Республикын сулло артисткыже», а 2009 ийыште «Марий Эл Республикын калык артисткыже» почётан лÿмым пуымо. 

Ее репертуар:

1985    В.Розов «Сÿан кечын» («В день свадьбы») — Клава
           И.Шамякин «Шöртньö медаль»(«Золотая медаль») — Женя
1986    Б.Васильев «Ӱжара нöлтмö годым» («А зори здесь тихие») — Гурвич Соня
1986    А.Николаева «Кö титакан?» («Кто виноват?») — Ольга
1986    М.Рыбаков «Оза вате» («Хозяйка») — Санюк
1987    К.Коршунов «Шарнет, Элиса?» («Помнишь, Элиса?») — Элиса
1987    Н.Семёнова «Коҥга пайрем» («Печка на колесе») — Галя
1988    С.Николаев «Салика» — Салика
1989    Л.Яндаков «Тулык ава» («Кукушка») — Лиза
1989    М.Рыбаков «Онарын кердыже» («Меч Онара») — Эрвика
1989    В.Регеж-Горохов «Почан шÿдыр» («Метеорит») — Валя
1990    М.Рыбаков «Мокмыр» («Похмелье») — Венера
1990    А.Островский «Сонарзе ден суксо» («Таланты и поклонники») — Линера
1991    А.Чебанов «Проска кокай ўдыржым марлан пуа» («Тетушка Прасковья дочку замуж выдает») — Галя 
1991    М.Рыбаков «Тÿрлемÿдыр» («Кружевница») — Веруш
1991    А.Волков «Оръеҥ мелна» («Свадебные блины») — Тоня
1993    Н.Угарин «Кочо йöратымаш» («Окровавленная фата») — Маша
1994    Н.Гоголь «Каче пазар» («Женитьба») — Дуняша
1994    В.Пектеев, Ю.Байгуза «Окса тул» («Блеск монет») — Ануш
1994    А.Пудин «Эрла агавайрем» («Завтра — агавайрем») — Изÿдыр
1994    А.Камю «Йоҥылыш» («Недоразумение») — Мария
1995    М.Рыбаков «Морко сем» («Моркинские напевы») — Верук
1995    Л.Яндаков «Пелчан кугыжа» («Царь Осот») — Висвис
1995    С.Элембаева «Чонтамык» («Покаяние») — Людмила Васильевна, Люда
1996    А.Иванова «Арале мыйым, волгыдо, Юмем!..» («Храни меня, мой светлый Бог!..») — Марина
1997    финский эпос «Калевала» — Куллервон шÿжарже
1997    К.Коршунов «Пÿрыдымö пÿрымаш» («Несужденная судьба») — Виня
1997    С.Лобозеров «Ӧрдыж тулар» («Семейный портрет с посторонним») — Таня
1998    К.Коршунов «Поргем ÿмбалне ÿжара» («Заря над пропастью») — Юнай
1998    Н.Арбан «Кем ургызо» («Сапожник») — Ойсандра
1998    Э.Рисклакки «Полдалге» («Безобразная Эльза») — Ирина
1998    В.Филиппов «Шоҥго ÿдырын мурыжо» («Песня старой девы») — Инна
1998    В.Пектеев, Ю.Байгуза «Окса тул» («Блеск монет») — Ануш, Юмынÿдыр
2002    В.Абукаев-Эмгак «Ош кече йымалне» («Под солнцем светлым») — Ик вате
2003    З.Долгова «Полдыранат ош пеледышан» («Белый цвет борщевика») — Овокля
2003    А.Островский «Чодыра» («Лес») — Улита
2003    Ш.Башбеков «Кум кечылан у кува» («Железная женщина») — Ониса
2004    С.Николаев «Салика» — Терей вате
2004    В.Абукаев-Эмгак «Куку шагат» («Часы с кукушкой») — Ольга Гавриловна
2005    В.Абукаев-Эмгак «Алиса, Анфиса, Аниса» — Марина
2005    З.Долгова «Пысман корем» («Овраг») — Чачи 
2005    Н.Дьяконов «Молан вашлийым тыйым?..» («Свадьба с приданым») — Лукайра
2006    В.Розов «Сÿан кечын» («В день свадьбы») — Сергеевна
2007    С.Чавайн «Мÿкш отар» («Пасека») — Татьяна Григорьевна
2007    З.Долгова «Ӱдыр сий» («Девичьи посиделки») — Семон вате
2007    А.Слаповский «Блин-2» — Ирина Блинова
2008    П.Захаров «Шешке – шемгишке» («Невестка») — Матрона
2008    М.Шкетан «Ачийжат-авийжат!..» («Эх, родители!..) — Матра
2009    А. Копков «Кок почан янлык» («Слон») — Марпа
2010    В.Григорьев «Юзо гармонь» («Волшебная гармонь») — Чурикан вате
2011    В.Регеж-Горохов «Кугезе муро» («Песня предков») — Элеса
 

 

{phocagallery view=category|categoryid=43|limitstart=0|limitcount=0|detail=3|displayname=0|displaydetail=0|displaydownload=0|displaydescription=0|displayimgrating=0}