Марий АССР-ын сулло артистше (1989)
1949 ий 26 августышто Морко район, Кугу Шоръял ялыште кресаньык ешеш шочын. Морко кыдалаш школым тунем пытарымеке, М.Шкетан Марий кугыжаныш театрын полышкалыше тÿшкажын актёржо лийын. Тыгак Республикысе курчак театрыште актёр-курчакозалан ыштен. 1968-1969 ийлаште Республикысе культурно-просветительский училищыште тунемын. 1969 ийыштак А.В.Луначарский лÿмеш Театр искусство кугыжаныш институтыш, П.В.Леслин группышкыжо (II национальный студийыш) пурен. Вич ий гыч М.Шкетан лÿмеш Марий кугыжаныш драматический театрыш толын. Вес ий шошым Совет Армий радамыш каен. Салтак корным эртымеке, икмыняр жап марий телевиденийыште режиссёр пашам шуктен. 1977 ийыште М.Шкетан Маргостеатрыш пöртылын.
Профессиональный сценыште Ю.Алексеев икымше ошкыл гычак шкеж нерген шонкалаш йöратыше, образым психологий могырым радамлын почын пуаш тыршыше актёр семын палдарен. Тÿҥалтыште марий комиссар Кужнуровын (С.Николаев, «Комиссарын чапше», 1974), сар гыч сокыр лийын пöртылшö Стапан Микалын (М.Рыбаков, Морко сем», 1975), Григорий Карамасовын (А.Асаев, «Ӱжара мурызо», 1978) образыштым чоҥен. Республикысе да всесоюзный газетлаште да журналлаште режиссёр С.Кириллован шындыме «Вуянче ава ден шочшыжо-влак» спектакльым (1975) моктен возеныт. Тыште Ю.Алексеев Щвейцаркесын рольжым модын.
Ю.Алексеев — усталыкше дене тÿрлö рольым, тÿрлö образым чоҥен кертше, жапым тÿрыс умылен да, тудлан келшышын, образым почын пуышо актёр. М.Шкетанын «Ачийжат-авийжат» драмыж почеш шындыме тыгаяк лÿман спектакльыште Мачукын (1981), С.Чавайнын «Мÿкш отарыштыже» Мичин (1988), С.Николаевын «Айвикаштыже» Янгелдын (1982), Вс.Вишневскийын «Оптимистический трагедийыштыже» Алексейын (1980), В.Шекспирын «Лир кугыжаштыже» Эдгарын (1984) да молыштат моло образ лач тидымак пеҥгыдемдат. Уста актёр улмыжым, уло чонжо, шонымашыж дене образыш пурен кайымыжым чодыра озанлыкым вияҥдыме пашам шуктышо учёный Айдарын (М.Рыбаков, «Чодыра мÿй», 1980) рольыштыжо ужына: актёр грим деч посна шкенжын геройжын самырык да илалше ийготысо илышыжым йÿкшö, кап-кыл лывыргылыкше дене почын пуэн. Актёрын илышыште философ кумылан улмыжо В.Распутинын «Пытартыш кече» спектакльыште Михаилын (1987) рольыштыжо раш коеш.
Комедий сынан роль-влакымат Ю.Алексеев мастарын модеш: произведенийынын могай жанр дене возалтмым, манмыла, вемже денак шижеш. Санденак кеч-кудо рольжат тудын оҥай улыт. Пашка (Вяч.Абукаев-Эмгак, «Ушкал йомын огыл», 1985), ондак шабашкым ыштен коштшо Атлашкин (М.Рыбаков, «Оза вате», 1986), пудыраныше вуян философ Плутарх (М.Рыбаков, «Мокмыр», 1990) да молат ончышым воштылаш веле огыл, шонкалашат таратат.
Пашажым, усталык ден мастарлыкшым кÿкшын аклен, 1989 ийыште Ю.Алексеевлан «Марий АССР-ын заслуженный артистше» почётан лÿмым пуымо.
1991 ий сентябрьыште Ю.В.Алексеевым Марий самырык театрын директоржылан шогалтат. Тыште вуйлатыме паша гутлаштак Юрий Валерьевич Озамбайын (С.Никлаев, «Айвика», 1991), Пектейын (М.Рыбаков, Яндар ден Шымавий», 1991), Никита Сапаевын (В.Домрачев, В.Сапаев «Эрге», 1992), Ӧртöмö онын (Г.Гордеев, «Ӧртöмö он», 1993) да молынат рольыштым чоҥен.
1992 ий сентябрьыште Ю.В.Алексеев Республикысе курчак театрым вуйлаташ тÿҥалеш, но тушто кужу жап ок кучалт – 1993 ий январьыште тудым Марий Эл правительствыш культура да искусство йодын дене консультантлан налыт.
Актёр да вуйлатыме пашам шуктымо жапыштак Ю.В.Алексеев Марий республикысе культура да искусство колледжын театр отделенийыштыже ÿдыр-рвезе-влакым туныктен.
Ю.В.Алексеевын илышыж ден творчествыж нерген возеныт:
Калязин В. Великая капитуляция // Театр. 1978. № 4. С. 41-44.
Георгина М. Театрын ÿшандарыше вийже //Марий коммуна. 1979. 11 май.
Кириллова С. В нашем театральном доме // Молодой коммунист. 1980. 16 февраль.
Крылова Е. Главное – найти себя // Молодой коммунист. 1981. 13 июня.
Георгина М. Сложный путь поисков // Марийская правда. 1982. 3 марта.
Анисимов Э. Чÿкшö курыкын эргыже // Марий коммуна. 1982. 19 март.
Кульбаева Н. «Ме тÿрлö койышна дене оҥай улына // Кугарня. 1991. 15 ноябрь.
Крылов В. Марий Элын артистше-влак: Юрий Валерьевич Алексеев // Ончыко. 2002. № 10. С.96-98.
Алексеев Юрий Валерьевич // Кто есть кто в Марий Эл. Йошкар-Ола, 2002. С. 24.
Григорьев Ю. «Чиновник пашаште улам. Шӱмыштем «искусствын тулжым» нумалам» // Марий Эл. 2004. 6 ноябрь.