Композитор-влак ушем член (1975)
Марий Эл Республикын калык артистше (1996)
МАССР искусствын сулло пашаеҥже (1981)
МАССР Кугыжаныш премийын лауреатше (1978)
Композитор Виталий Михайлович Алексеев Морко район, Нуръял лÿман ялыште 1946 ий 14 сентябрьыште шочын. Изи годсек балалайка да гармонь дене шоктен, а вараже почеламутым возаш тÿҥалын. Нуным районышто лектын шогышо газетлаште савыктен. Кугу Кожлаял школ деч вара тудо Йошкар-Оласе И. Палантай лÿмеш музыкальный училищын Лилия Васильевна Сергееван классышкыже скрипка дене шокташ тунемаш пурен. А вара вара теорий отделенийыш куснен да композиций классыштат вийжым тергаш шўмаҥын. Виталий Михайлович кумдан палыме композитор-влак Э. Сапаев, К. Смирнов, К. Гейст дене вашлийын да нунын дене тунемаш тÿҥалын. А консерваторийыш пураш тудым Марий Эл композитор-влак ушемын членже-влакым туныктышо, уста педагог Поль Миронович Двойрин ямдылен. Эше училищыште тунеммыж годымак В. М. Алексеев шке возымо «Лук, йоча, ваштар ечетым» почеламутлан мурым серен да газетыште савыктен. Тыге тудо мурым возымо сомылым илышыштыже тÿҥ пашалан ойырен налын.
Москваште В. Алексеев А. Я. Эшпай, а вараже А. И. Пирумов ден композитор шинчымашым умбакыже келгемден.
1968 ийыште самырык композитор Виталий Алексеевын Марий композитор ушемын пленумжылан пöлеклалтше концертыштыже Миклай Казаковын почеламутшылан возымо кок романсше, струнный квартет да скрипка ден фортепианолан поэмыже йоҥгеныт.
Диплом пашалан композитор флейта ден симфонический оркестрлан кум ужашан концертым налын.
Тиддеч вара В. Алексеев Семипалатинск олаште ПВО войскаште службым эртен.
1975 ий гыч В. Алексеевын вес усталык жапше тÿҥалын. Тудо 1-ше номеран художественный школ-интернатыште да М. Шкетан лÿмеш Марий кугыжаныш театрыште пашам ышта. Тиде ийынак 8 майыште Миклай Рыбаковын «Морко сем» драмыж почеш спектакльын премьерыже театрыште лиеш. Тиде постановкылан музыкым Виталий Алексеев возен. 1978 ийыште драматург да композитор Марий Элын Кугыжаныш премийже дене палемдалтыныт.
Марий Эл композитор-влак ушемын ответственный секретарьже лиймеке, Виталий Михайловичын пашаже ешаралтын – вет тудо тиде жапыштак Марий театрыштат музыка ужашым вуйлатен. Тÿрлö вере гастроль дене лийын. Тыге финн да эстон режиссёр да композитор-влак дене вашлийын. Финляндийыште «Калевала» пьесын режиссёржо Пааво Лиски дене палыме лийын. Тыге икмыняр жап гыч ты режиссер Марий театрыште «Калевала» спектакльым шынден, а музыкыжым тудлан Виталий Алексеев финн композитор Лауканен дене пырля возеныт.
Коло ий утла Виталий Михайлович Алексеев М. Шкетан лÿмеш Марий театрыште чыла спектакльым музыка дене сöрастарымылан мутым кучен. Шкежат ятыр спектакльлан мурым, семым возен. Тыге тудо М. Рыбаковын «Морко сем», «Томаша», В. Регеж-Гороховын «Кугезе муро», С. Чавайнын «Акпатыр», М. Шкетанын «Мыскара кас», Т. Миннуллинын «Чодыраял Элыксандр» да моло спектакльланат музыкым келыштарен.