Шомак — чапланыше марий драматург С.Николаевын «Салика» пьесыж почеш сценыште модмо спектакль нерген. Тынар жапыште тудо 11 гана угыч шындалтын. Теҥгече «Салика» дене театр коллектив 98-ше тургымым петырыш. Тиде произведенийын авторжын шочмыжлан мартыште 110 ий темын.
Тургымым иктешлыме кастене ончышо-влак коклаште эн сай артистым рашемдыме шотышто йӱклымашым иктешлыме. Тушто сеҥышыш Марий Элын сулло артистше Сергей Данилов лектын. «М-tour» турагентстве вуйлатыше О.Аптышева (лач тудын темлымыж почеш тиде паша ышталтын) Сергей Ксенофонтовичлан Туапсеш канаш каяш путевкым кучыктен.
Самырык актер-влак Светлана Александрова ден Иван Соловьев Марий Эл Республикын культур, печать да калык-влак кокласе кыл шотышто министерствыжын Таумутшо дене палемдалтыныт. Актер да цехлаште тыршен пашам ыштыше-влаклан театрын Таумутшым кучыктымо.
В.Абукаев-Эмгак лӱмеш поро кумылым ончыктышо «Ший памаш» фонд (вуйлатышыже – Василий Краснов) самырык актер-влак Марина Воронцовалан, Игорь Антроповлан, Михаил Александровлан шке премийжым кучыктен.
Тургым петыралтын. Но паша умбакыже шуйна. Кызыт артист-влак А.Островскийын «Лумӱдыр», тыгак уста марий драматург Арсий Волковын «Йорга вате» пьесыж почеш репетицийым эртарат.
Ик группо «Ойырледа? Огына ойырло» спектакль да концерт программе дене Татарстан, Башкортостан, Пермь край ден Сверловский областьыш гастрольыш каяш ямдылалтеш. Тудо 31 май гыч 12 июнь марте шуйна.
{phocagallery view=category|categoryid=222|limitstart=0|limitcount=0|detail=3|displayname=0|displaydetail=0|displaydownload=0|displaydescription=0|displayimgrating=0}