«Корий кугыза да … шӱвырзӧ» – тыгайым шарна калык Георгий Пушкиным

 

Чӱчкыдынак тыге лиеш: актер сценыште пеш шуко образым чоҥа. Но тудо посна роль дене шарналт кодеш. Марий Элын калык, РСФСР-ын сулло артистше Георгий Пушкин нерген мут лекмеке гын, шинчаончыко вигак «Мӱкш отарысе» Кори кугыза толеш. Кошар пондашан, поро, шыма, тулык Клавийым чаманыше… Да эше Георгий Максимович шӱвыр шоктышо мастар семын келге кышам коден. Таклан огыл 23 ноябрьыште тудын илыме пӧрт пырдыжеш (Ленинский проспект, 19) сакыме Шарнымаш оҥамат шӱвырым оҥарыме, тӱмырым пералтыме марий сем дене почмо.

Таче шӱвыр дене шоктышо еҥым парня дене шотлен муаш лиеш. А теве М.Шкетан лӱмеш Марий драме театрын артистше-влак тиде семӱзгар дене кызытат сценыш лектыт. Марий Элын сулло артистше Сергей Данилов шӱвырым шке семын ышташ да шокташ тунемын, да кызыт тиде семӱзгарым семмастар Марий Элын сулло артистше Евгений Сергеев дене коктын оҥарат.

Шарнымаш оҥам почмо годым  нылле ий марий сценыште модшо Георгий Пушкин нерген эн ончычак Марий Элын сулло артистше Юрий Алексеев шарналтен. Вет тудлан ик сценыште пырля модаш пиал логалын. А теве Российын сулло артистше Олег Кузьминых Георгий Максимовичын пӧлеклыме шун шӱшпыкым кызытат арала, тыгаяк кӱкшӧ лӱман Иван Смирнов кугу опытан актерын «шольым, сценыште модмет годым кӱварвалне нимом ит кычал» манме ойжым ӱмырлан шарнен кодын. Чапланыше художник Ямберде Йыван Георгий Максимовичын тунам эше самырык сӱретчылан пеледыш аршашым кучыктымыжат тачысе гай шарна. Мут толмашеш, кызыт тудо кугу актерын портретшым воза. Лӱмлӧ марий композитор Сергей Маковланат (Макэмари) шӱвырзӧ дене вашлийын мутланаш пиал логалын.

– Тачысе марий шӱвыр гай тетла тӱнямбалныжат уке, – ойла Сергей Николаевич. – Вет мемнан шӱвыр тӱҥалтыште могай лийын, тугак кодын, тудым нимо семынат уэмдылме огыл.

А теве ынде Йошкар-Ола урем дене эртыме годым Шарнымаш оҥам ужын, эше ик гана марий сценын легендышкыже савырныше Георгий Пушкин нерген порын шарналташ йӧн лектын.

М.Шкетан лӱмеш Марий драме театр артист-влакым суапландарыме пашам  умбакыжат шуяш тӱҥалеш.

{phocagallery view=category|categoryid=196|limitstart=0|limitcount=0|detail=3|displayname=0|displaydetail=0|displaydownload=0|displaydescription=0|displayimgrating=0}