Икымше роль модалтын
Кодшо ийын М.Шкетан лӱмеш Марий кугыжаныш драме театрын труппышкыжо М.Щепкин лӱмеш кӱшыл театр училищым тунем лекше 14 актер ушнен. Самырык артист-влак кокла гыч икымше да тӱҥ рольым чоҥышо-влакат улыт. Мутлан, «Салика» спектакльым налаш. Тушто Салика ден Эчукым, Марина ден Чопайым да икмыняр моло рольым самырык артист-влак модыныт.
А таче тендам, газетнам лудшо-влак, Саликам модшо Марина Воронцова ден Эчукын образшым чоҥышо Игорь Антропов дене палымым ыштена.
 
«Мураш моткочак йӧратем»
Марина Воронцова - Шернур районысо Чылдемыр ялын ӱдыржӧ. 10-шо классыште тунеммыж годым Марина мураш тӱҥалын. Музыклан шӱмаҥдымаште туныктышыжо Лариса Аркадьевна Беликован надырже кугу. Ӱдыр тунамак эстраде муро конкурслашке ушнен, республикыште школжын, районжын чапшым арален, ончыл верыш лектын. Роза Искакован репертуарже гыч «Кузе илет, авай?», Эльвира Токташеван «Кеҥеж йӱр» мурышт-влак дене сценыш лектын.
- Мыланем музык дене кылдалтше профессий лишыл чучын, - манеш ӱдыр. - Сандене музыкальный училищыш, вокал отделенийыш (академический вокал) пуренам, Марий Элын сулло артистше Галина Александровна Шабрукован классышкыже логалынам.
Умбакыже Марина консерваторийыш але музыкальный институтыш каяш шонен пышта. Но шонымашке шуаш йӧсӧ лийын.
Музыкальный училищыште актер мастарлыклан да сценыште мутланаш туныктышо предмет-влакым М.Шкетан лӱмеш Марий кугыжаныш драме театрын артистше, Марий Элын калык артистше Маргарита Медикова вӱден.
- Занятийыште почеламутым лудынна, ойлымаш гыч ужаш-влакым, басньым сылнын йоҥгалтараш тунемынна. 2011 ийыште Щепкин лӱмеш кӱшыл театральный училищыш ӱдыр-рвезе-влакым марий студийыш погымо нергенат Маргарита Егоровна ойлен, - палемда М.Воронцова.
Маринат тушко пураш вийым терга да тунемаш пурен кертеш.
Марий кундем гыч тунемаш кайыше йолташыж-влак дене пырля Маринат Шкетан театрын артистше-влак ешыш ушнен. Эртыше идалык мучаште «Салика» спектакльыште тӱҥ героиньым, Саликам, модын.
- Икымше роль вучыдымо ыле. Кумдан палыме артист-влак деч вара мылам, тунемын гына толшо ӱдырлан, Саликам модаш лӱдмашанла чучын, - мутшым шуя Марина. - Но паша тугай: кеч-могай рольым ӱшанен пуат гын, тудым чоҥыман. Опытан артист-влак полшат, ой-каҥашым пуат. Пеш кугу таум нунылан каласем.
Саликан рольжо кугу: шӱм-чон корштымым, ойгым муро гочат ончыктыман. Марина тиде образыш пурен кертын да калыкым куандара, тургыжландара, шонем.
Москошто тунеммыж годым ӱдыр Дима Воронцов дене ешым чумыреныт. Кызыт ик ият пелаш ӱдырышт куандара.
Театр сцене деч посна Марина эстрадыштат вияҥеш. Калык тудым Арина лӱм дене пала.
 
Космонавт, юрист, а ынде - артист
Игорь Антропов - Шернур посёлко гыч. Изиж годым космонавт-летчик лияш шонен. Сандене модыш-влак кокла гычат эн йӧратыме модышыжо самолёт лийын. Варажым, кушмо семын, тиде профессий мондалтын.
11 класс деч вара Игорь Йошкар-Оласе строительный техникумыш юристлан тунемаш пурен. Кок ий гыч кидышкыже армийыш каяш повесткым налеш. Рвезе эше техникумышто тунеммыж годымак Самырык десантникын школышкыжо коштын. Тыгодым кайык чоҥештыме кӱкшыт гыч ик гана парашют дене тӧрштен шуктен.
«Шонымашет уло гын, тушко шуаш тыршыман» , - калыкыште ойлат. Рвезат шонымашкыже шуын: юж-десант войскашкак логалын.
Армий гыч пӧртылмек, Шернур поликлиникыште юристлан пашам ышташ тӱҥалын.
- Икана телевизорым ончен шинчымем годым Москосо кӱшыл театр училищыш марий ӱдыр-рвезе-влакым тунемаш погымо да ойырен налме тур Шкетан театрыште эртыме нерген увертарымашым кольым, - каласкала Игорь. - Шуко шоналтыде, эрлашыжым эрденак Йошкар-Олашке кудалынам. Кастингыште чылажымат йодмышт почеш шуктенам. Тылзе гыч Москваште кокымшо турым эртенна.
Студент пагытше куштылгыжак эртен огыл. Индеш шагат эр гыч тӱҥалын, лу шагат кас марте тунемыныт. Актёр мастарлык предметшак кечыште вич шагат шуйнен. Туге гынат, тудо студент пагытшым эреак порын шарнаш тӱҥалеш, вет пелашыж денат лач тунеммыж годымак палыме лийыныт да кок пиалан еҥ ӱмаште, идалык мучаште, ешым чумырен.
- Кокымшо курсышто тунемме годым Эрвина Гордеева дене мылам драматург Александр Червинскийын «Счастье моё» пьесыж гыч ужашым тунемаш пуэныт. Мый военный моряк лийынам, а Эрвина — тулык ӱдыр. Репетицийна кужун шуйнен. Тылзе, кок тылзе, пел ий... тыге чоныштына йӧратымаш тул ылыже, - мане Игорь.
И.Антропов «Саликаште» Эчукым модын. Тиде рольым режиссерын ӱшанен пуымыжым куанлан, пиаллан шотла. Тиддеч посна рвезе Москошто тунеммыж годымат «Мещане» (Йошкар-Олаште тудо ончыкталтын огыл) спектакльыште тӱҥ рольым (Нил) модын.
 
А.Байкова.
"Марий Эл" газет. 2016 ий 15 март 
 

Афиша

3 мая /ср/ -
Ух, пӧръеҥ-влак! 
Концерт /12+/
Начало в 18.00
Купить билет 

12 мая /пт/ -
Юбилейный концерт 
Анатолия Николаева /12+/
Начало в 18.00
Купить билет 

18 мая /чт/ -
Премьера
Тулар ден тулаче /Сват и сваха /12+/
Начало в 18.00
Купить билет  

21 мая /вс/ -
Нар. арт. РМЭ Светлана Строганова: 
У меня сегодня день рождения
Концерт  /12+/
Начало в 15.00
Билеты в кассе театра

Cпектакли идут с синхронным переводом на русский язык.

Время работы кассы с 11 до 19 час.,
обед - с 14.00 до 15.00
понедельник - выходной.

Забронировать билеты можно по тел. 
78-13-78 (касса).

Виртуальный тур

Задай свой вопрос!

Нажмите на изображение, чтобы его изменить

Юбилейные даты


23 марта - 90 лет
засл. арт. МАССР, засл. арт. РСФСР
(1927-2014) 
 
23 апреля - 85 лет
засл. деятелю искусств МАССР,
нар. арт. РМЭ
(1932-2009) 



 
 

Если у Вас есть вопросы или предложения по поводу работы сайта, можете написать администратору: web@shketan.ru
MariRussian (CIS)English (United Kingdom)