«Театральный Йошкар-Ола» фестиваль кажне ийын эн сай театр паша-влакым палемда. Тений Гран-прим М.Шкетан лӱмеш театрын «Юмынӱдыр» мюзиклже сеҥен налын.
Арня утла шуйнышо фестивальым Марий Эл Республикысе тӱвыра, печать да национальность паша шотышто министерстве ден Россий Федерацийысе театр деятель-влакын ушемышт эртарат. Тышке кажне гана кундемнан чыла профессионал театрже ушна. Артист, режиссер, сценограф да молыланат тиде – кугу пайрем, тыгодымак вургыжмо тат. Вет нунын пашаштым жюри акла. Тений тудым Моско гыч Россий Федерацийын театр деятельже-влак ушем пеленсе театр критике кабинетым вуйлатыше Элеонора Макарова «вӱден». Тыгак Санкт-Петербург театральный журналын редакторжо,  критик Анна Константинова, театр критик-влак Арнине Оганесян (Моско), Василина Мартемьяк (США, Сиэтл ола) да Чуваш кугыжаныш опер да балет театрын сылнымут ужашыжым вуйлатыше, музыковед Сергей Фишер акым пуэныт.
Икымше кечын М.Шкетан лӱмеш национальный театрын артистше-влак М. Рыбаковын «Морко сем» пьесыжым ончыктеныт. Тиде кечынак Г.Константинов лӱмеш Академический руш драме театрыште И.Лысовын пьесыж почеш шындыме «Случайное счастье» спектакль лийын. Курчак театрын Н.Гогольын «шинель» повестьше негызеш вес семын. ойыртемалтшын шындыме «Бедный Акакий» постановкат жюрилан келшен. Критик-влак Э.Сапаев лӱмеш опер да балет театрын пашаже-влакымат, Самырык театрын спектакльже-шамычымат палемдышт. Нуно постановко-шамыч нерген сай шомакым ойлышт, но тыгодым ятыр кӱлеш каҥашым пуэдышт, йоакымат радамлышт, кузе чын ышташ кӱлмым рашемдышт. Тидым режиссер-влак шотыш налыт гын, сай лиеш ыле.

Сеҥыше-влакым саламлена
Жюри Й.Кырля лӱмеш национальный театр премий дене шуко номанийыште сеҥыше-влакым палемден. Ме икмыняржым ончыктена. Тений М.Шкетан лӱмеш национальный театр поснак шуко номинацийыште ойыртемалте. Эн ончычак, «Юмынӱдыр» мюзикл Гран-Прим сеҥен нале. Тыштак Палин образшым чоҥышо актрисе Галина Иванова «Кокымшо планан эн сай ӱдырамаш роль» номинацийыште ойыртемалте, Кугыракын рольжым модмылан Юрий Алексеевым «Кокымшо планан эн сай пӧръеҥ роль» номинацийыште палемдышт.
Тыгак сеҥыше-влак коклаште: 
- «Национальный йӱлам арален кодымылан» номинацийыште – М.Шкетан лӱмеш театр «Морко сем» постановкыжлан;
- «Драме спектакльыште эн сай ӱдырамаш роль» номинацийыште – Марий самырык театрын шындыме «Марпа» моноспектакльыште модшо Светлана Никитина;
- «Балетыште эн сай партий» номинацийыште Э.Сапаев лӱмеш опер да балет театрын вӱдышӧ солистше-влак Константин Коротков ден Ольга Челпанова «Корсар» балетысе рольыштлан;
- «Эн сай режиссура» - Э.Сапаев лӱмеш опер да балет театрын художественный вуйлатышыже Константин Иванов «Корсар» балетым шындымылан;
- «Кокымшо планан эн сай ӱдырамаш роль» номинацийыште «Морко сем» драмыште Кропинян рольжым модшо Маргарита Медикова.
РФ театр пашаеҥ-влакын республикысе пӧлкажым вуйлатышын посна премийжым М.Шкетан лӱмеш театрыште марла спектакльым рушлашке моштен кусарымыжлан Алевтина Соловьева нале, а театр директор-шамычын премийыштым Курыкмарий театрын актрисыже Светлана Зотиналан пуышт. Тудо тений 30 тӱжем теҥгелан кеч-кушко канаш миен толын кертеш. Моло сеҥыше-влакымат шокшын саламлена, а вес тыгаяк фестиваль деч эшеат сай, виян спектакль-влакым вучаш тӱҥалына. Тидлан мемнан республикыште усталык вий уло.
Ирина Степанова.

Марий Элын сулло артисткыже Светлана Строганова:
- Кажне театрлан, кажне артистлан фестиваль – кугу тергымаш. тиде вучымо да тургыжландарыше жап. Тудо посна артистлан гына огыл, а пӱтынь театр коллективлан вияҥаш полша. Мемнан пашана – чумыр паша. Вашла ончен, тыге ышташ гын сай, але тыге ышташ тӧчымат ок кӱл манын иктешлена. Икте-весе деч тунемына. Да вес театр-влак дене пырля тиде жапым эртарен колташ моткоч куанле. Вет ме ик кундемыште, ик олаштак пашам ыштена гынат, вашла шуэн вашлийына. А тыге идалыклан ик гана фестиваль пырля уша, тиде жапым ик КУГУ еш гай пайремлена!
Мемнан «юмынӱдыр» спектакль Гран-Прим сеҥен нале. Ме тудым суленна, шонем. Кугу паша ышталтын. Театрысе чыла пашаеҥым ты сеҥымаш дене шокшын саламлем!

Василина Мартьемьяк, жюри член, Америкысе Сиэтл олаште усталык мастерскойым вуйлатыше, тусо руш сӱретче-влак ассоциацийын вице-президентше:
- Шочмо Йошкар-Олашкем толмо мыланем вийым пуа. Америкыште 14 ий наре илем гынат (тушто тунемше эргым деке каенам да, шоныде, илаш кодынам), чонем садак шочмо верыш шупшеш, вет тыште мый кушкынам, модын куржталынам, йолташем-влак тыште лийыныт да илат. тыштак – ача-авамын шӱгарышт. Мый ятыр ий Академический руш драме театрыште сылнымут пӧлкам вӱденам. Республикысе чыла театрын пашажым эскерен шогенам. Кызыт нунын постановкыштым ончем да ӧрам: кушкыт артист-влакат, режиссер-шамычат. Эре ум кычалымт, эксперимент деч огыт лӱд, мураш-кушташат тале улыт, йӱкыштат сай. Мый Америкыште индеец-влкын, перуанский, мексиканский театр-влакым онченам. Мемнан актер-влак мастарак улыт. Спектакль годым шинчаштем чӱчкыдын куан шинчавӱд лектын. Браво! Марий Эл Республикысе правительствылан тынар профессионал театрым кучымыжлан кугу таум ойлымо шуэш. Теве Америкыште гын театр-влак утларакшым спонсор кӱшеш гына пашам ыштат.

Жюри вуйлатыше Элеонора Макарова:
- Изи гына Йошкар-Олаште тынар театр пашам ышта. Тидлан куаныман веле. Адакшым кажныжын репертуарже ойыртемалтше. Калыклан тиде оҥай, шонем. Мюзиклат, моноспектаклят улыт, Курчак театрыштат оҥай постановко-влакым ужаш лиеш. Мый тидлан куанем веле.
Теве М.Шкетан лӱмеш театрын шындыме «Юмынӱдыр» мюзикл нерген келге шонымаш кодо. Тудым шуко жап шарнаш тӱҥалам, очыни. Тыште вокал пеш виян. Сылне сценографий, костюм, тачысе кечылан келшен толшо материал. Тиде спектакльым «марий код» семын палемден кертам. Зрительный зал гыч каймат ыш шу. Тысе уло коллективлан тынар тыршымыштлан кугу таум ойлыман.

«Кугарня», 2013 ий, 29 март

Additional information