Марий АССР кульурын сулло пашаеҥже

З.П. Акпулатова 1925 ий 25 августышто Куженер район, Микал почиҥга ялыште шочын. 
1939 ийыште Коҥганур шымияш школым тунем пытарымек, колхозышто пашам ыштен. 1943 ий ноябрьыште М. Шкетан лӱмеш Марий кугыжаныш драме театрыш толын да секретарьлан ышташ тӱҥалын. 

1945 ий октябрьыште Марий кугыжаныш драме театр пеленсе театральный студийыш тунемаш пурен да кок ий тыште тунемын. «Драме театрын актёржо» специальность дене дипломым налмеке, Зоя Павловна Козьмодемьянскыш каен, тушто Марий колхоз театрыште актрисылан ыштен. З. Акпулатова, тушто пашам ыштышыла, тӱҥ шотышто кугурак ийготан ӱдырамаш-влакын рольыштым модын: мутлан, Николай Арбанын «Кеҥеж йӱд» спектакльыштыже Ведасин, А. Софроновын «Моско койыш-шоктыш» спектакльыште Кружкован, Ф. Соллогубын «Беда от нежного сердца» (тиде спектакль рушла шындалтын) водевильыштыже Дарья Семёновнан, Арсий Волковын «Мотор Пампалчыштыже» Изи иян, Николай Дьяконовын «Молан вашлийым тыйым» спектакльыштыже Похлёбкинан рольыштым келыштарен. Чыла образымат актриса шӱм-чон вошт колтен чоҥен.

1956 ийыште Козьмодемьянскыште Марий колхоз театрым пужен ыштымеке, Зоя Павловна Акпулатова АТК-ште кондукторлан тыршен. 1961 ийыште М. Шкетан лӱмеш Марий кугыжаныш драме театрыш толын. Тӱҥалтыш жапыште режиссёрын полышкалышыжлан тыршен, икмыняр спектакльыште роль-влакым модын. Труппым вуйлатен. 

Республикыштына культурым арален кодымашке да вияҥден колтымашке изи огыл надырым пыштымылан Зоя Павловна Акпулатовам «Марий Эл Республика культурын сулло пашаеҥже» почётан лӱм дене палемдыме. 
Кызыт сулен налме канышыште.

Additional information

До празднования 100-летия театра осталось