МАЗИКОВА ВЕРА КУЗЬМИНИЧНА,
Марий АССР-ын сулло артисткыже (1957).

1924 ий 9 мартыште Звенигово районысо Эсмекплак ялысе кресаньык ешеш шочын. 1939 ийыште Эсмекплак тичмаш огыл кыдалаш школым тунемын пытарен да Марий музыкально-театральный училищын театр отделенийышкыже пурен. 1941 ийыште училищым петырымеке, В.Мазиковам Маргостеатрын труппышкыжо налыныт. Сар жапыште театр ӱмбаке вочшо нелылыкым пайлен, самырык актрисе спектакль да концерт программе дене калык ончыко лектын. Икымше рольжо-влак коклаште С.Николаевын «Шинелян ӱдыр» драмыж почеш шындыме тыгаяк лӱман спектакльыште пионеркан (1942), Н.Арбанын «Янлык Пасетыштыже» Анушын (1944) рольыштым палемдыман. Сар деч вара актрисе ушеш кодшо икмыняр чапле рольым ыштен: Женя (К.Симонов «Мемнан оласе рвезе», 1946), учительница Клавдия (М.Шкетан «Кодшо румбык», 1949), Лумӱдыр да актриса Коринкина (А.Островский «Лумӱдыр», (1946), «Титакдыме титакан-влак», 1948). Сай паша семын кызытсе жапын героиньыже Татьяна Рябининан (С.Николаев «Шочмо кече», 1947) да Любовь Шевцован (А.Фадеев «Рвезе гвардий», 1947) образыштым палемдыман.
В 1949 ийыште В.Мазикова Ленинградысе А.Н.Островский лӱмеш кугыжаныш театральный институтын актер отделенийышкыже пурен, РСФСР искусствын заслуженный деятельже профессор Л.Ф.Макарьевын курсыштыжо тунемын. Тунемын пытарымек, 1954 ийыште актриса М.Шкетан лӱмеш Маргостеатрыш пӧртылын.
Мотор шӱргывылышан улмыжо, калыкым савырен моштымыжо, пашам лийжак манын ыштымыже, сценыште чоҥымо образым келгын почын пуымыж дене В.Мазикова пеш вашке репертуарыште чӱчкыдын вашлиялтше актрист-влак радамыш пурен.
Тӱнямбал, руш, национальный классик-влакын произведенийышт почеш шындыме спектакльлаште тӱрлӧ планан рольым чоҥен:
Джулия (В.Шекспир «Веронысо кок рвезе», 1963), Варвара (А.Островский «Кӱдырчан йӱр», 1955), С.Чавайнын пьесылаштыже Эвика («Акпатыр», 1956), Клавий («Мӱкш отар» / Пасека, 1956), Нина Толстосумова («Марий рото» / Марийская рота, 1957).
1957 ийыште В.Мазиковалан «Марий АССР-ын заслуженный артистше» почетан лӱмым пуымо.
Комедий шотан рольлаште: Катя (Н.Арбан «Кеҥеж йӱд», 1957), Люба (А.Волков «Ӱдыр кумыл», 1955), Тайса (А.Волков «Оръеҥ мелна», 1963), драматическийыштат: Софья (И.Карпенко-Карый «Пиалдыме», 1958), Анна Ульянова (И.Попов «Еш» , 1962), Кансыл (И.Смирнов «Асан ден Кансыл», 1961), Орина (К.Коршунов «Кӱдырчан ӱжара», 1968) — актриса ӱдырамашын пӱрымашыжым келгын почын, тудын койыш-шоктышыжым ӱшандарышын ончыктен кертын.
В.Мазикова мер пашамат шуктен. Калык депутат-влак Йошкар-Ола горсоветын депутатшылан (1961-1963) сайлалтын.
«За доблестный труд в Великой Отечественной войне 1941—1945 гг.» (1946) медаль, МАССР Верховный Совет Президиумын Почетан грамотшо дене палемдалтын.
В.К.Мазикова М.Шкетан лӱмеш Маргостеатрыште 1969 ий марте ыштен, вара Республиканский культпросветучилищыш туныктымо пашаш куснен.

Тудын илышыже да творчествыж нерген возеныт:

Степанов М. Самырык вий (Молодые силы) // Марий коммуна. 1949.  9 дек.
В. К. Мазикова // Ончыко. 1958. № 1. С.110.
Иванченко С. Творческое горение // Молодой коммунист. 1958. 13 сент.
Иванченко С. Ончылно — кумда корно (Впереди — широкая дорога) // Рвезе коммунист. 1958. 13 сент.
Сергеев Н. Ончет — кумылет савырна (Смотришь — душа радуется) // Марий коммуна. 1961. 5 март.
Степанов М. Исменца ӱдыр артистка лийын  (Девушка из Исменцов стала артисткой) // Марий коммуна. 1962. 5 дек.
Георгина М. Марийский драматический театр: Страницы истории (1917—1978). Йошкар-Ола, 1979.
Николаев Сем. Эсен лийже усталык! (Да здравствует талант!) // Илышын воштончышыжо. Йошкар-Ола, 1994. С. 206.

Additional information

До празднования 100-летия театра осталось