Марий ешысе кÿэмалтше йÿла самырык-влакын илыш ончалтышышт дене келшен огеш тол. Тыгерак самырык ден илалше-влак коклаште умылыдымаш шочеш. Кок могырыштыжат - шке илыш радамыштлан пеҥгыдын ÿшаныше, шке илыш чыныштым пагалыше еҥ-влак. Иктышт шке торжалыкыштым «закон» дене келшен толшылан шотлат, весышт – тыгай «законын» шояжым тÿжвак лукташ тöчат. Чыланат икте-весышт ваштареш илаш-колаш шогалыт. Ача-ава шке йочаштым карга, иза ден шольо ваш-ваш кÿзö-товар кержалтыт...

Икымше гана «Ачийжат-авийжат...» спектакльым 1923 ийыште пьесын авторжо – марий сылнымутын классикше – М.Шкетан шынден. Тиддеч вара спектакль дек ятыр гана пöртылыныт. Кызытсе, кудымшо гана шындыме спектакль, М.Шкетанын 110 ияш лÿмгечыжлан пöлеклалын. М.Шкетан – кумдан палыме серызе – тÿрлö жанр дене пашам ыштен, прозо гыч тÿҥалын публицистика марте. «Ачийжат-авийжат...» пьесе драматургын кугу да кÿкшö усталыкшым почын ончыкта.

 

Additional information