Марий спектакль-влакым кӱкшын акленыт

12 гыч 18 ноябрь марте Марий Эл Республикынан рӱдолаштыже Финн-угор театр-влакын «Майатул» фестивальышт моткоч шокшын эртен. Вич кече жапыште родо-тукым калык-влакын – коми, карел, мордва, удмурт, хант-манси — йылмышт дене лу спектакльым ончымо. Постановко-шамыч кугурак ийготан-шамычлан веле огыл, кушкын толшо тукымланат лийыныт. Нуно илыш, еш, икте-весе кокласе кыл, шочмо кундемым, йыр улшо пӱртӱсым, тыгак шочмо йылмым йӧратыме, аклыме нерген шонаш тартеныт, шуко ойгым кондышо сар пагытын кочо тамже логар пундашеш комылям кӱзыктен.

 

Театрын йолташыже-влак кажне кечын кок-кум спектакль дене ончен кертыныт. Нуно Шкетан лӱмеш Марий национальный драме, Марий самырык театр-влакын сценыштышт эртеныт. Коллектив-влакын мастарлыкыштым профессиональный жюри аклен.

Фестивальым петырымылан пӧлеклалтше пайремыште Республикын тӱвыра, печать да калык-влакын пашашт шотышто министрже Константин Иванов, М.Шкетан лӱмеш Марий национальный драме театрын директоржо Эрик Юзыкайн, фестивальын да театрын художественный вуйлатышыже Василий Пектеев лийыныт. Нуно финн-угор калык-влак коклаште келшен илыме да ты мероприятийын кӱлешлыкше нерген ойленыт да толшо коллектив-влаклан тауштеныт.

– Финн-угор калык-влакын театрыштын вес фестивальже 2020 ийыште лийшаш, но ме вес ийын Шкетан лӱмеш Марий национальный драме театрын шӱдӧ ияш лӱмгечыжым пайремлаш тӱҥалына. Сандене икте-весе коклаште кылым кӱрлаш огыл манын, 2019 ийыште ме Национальный драматургий фестивальым эртараш кутырен келшенна, – палемден Константин Анатольевич. – Тыгодым спектакль-влакым ончаш веле огыл тӱҥалына, а кок арня жапыште финн-угор да вес регионласе драматург-влаклан семинар, тӱрлӧ мастер-класс да молат эртаралтыт. Семинарым иктешлымеке, эн сай паша-влак негызеш театрлаште спектакльым шындаш тӱҥалыт.

Пайремын куанле ужашыжлан, мутат уке, сеҥыше-влакым палемдыме татым шотылман.

Фестивальыште театр коллектив-влакын пашаштым профессиональный жюри тӱрлӧ номинацийлаште аклен:

– «Эпизодысо эн сай роль» – Александр Баймурзин «Степан и Настя» (Удмурт Кугыжаныш национальный театр);

– «Кокымшо планан эн сай пӧръеҥ роль» – Дмитрий Мишечкин, «Деревенские страсти» (Мордва национальный театр);

– «Эн сай пӧреҥ роль» – Дмитрий Тораев, «Кловой пылгомын семжы» (Курыкмарий драме театр);

– «Эн сай ӱдырамаш роль» – Наталья Гусянова, «Кловой пылгомын семжы» (Курыкмарий драме театр);

– Елена Гудожникова – «Деревенские страсти» (Мордва национальный театр);

– «Эн сай сценографий» – Мария Саблина, Анна-Ксения Вишневская, «Чев-чев» (Хант-Мансий АО гыч «Солнце» обь-угор калык-влак театр) ;

– «Музык дене эн сайын келыштарымаш» – Сергей Белов, «Кӧ кечым пӧртылта» (М.Шкетан лӱмеш Марий национальный драме театр);

Гран-при – М.Шкетан лӱмеш Марий национальный драме театр («Кӧ кечым пӧртылта»).

Жюрин лӱмын ямдылыме дипломжым налыныт:

«Калык сем тӱвыра ден классике балетын йӱлаштлан ӱшанле улмылан» – «Чодыра сем» (Э.Сапаев лӱмеш Марий кугыжаныш академический опер да балет театр);

«Спектакльым сайынрак шындаш тӱҥалмылан» – Ольга Искоскина (Курыкмарий драме театр – «Кловой пылгомын семжы»).

Театр пашаеҥ-влак ушемын Марий Элысе отделенийжын председательже Алла Александрова ушемын посна ямдылыме пӧлекшым кучыктен. «Кӧ кечым пӧртылта» спектакльыште рольым мастарын модмыштлан М.Шкетан лӱмеш драме театрын артистше-влак Иван Смирнов «Честь и достоинство», а Светлана Александрова «Ӱшан» номинацийлаште палемдалтыныт.

Сеҥыше-влакым саламлена да вес ганат Марий Элыште вучаш тӱҥалына!

Алевтина Байкова.
«Марий Эл» газет. 20.11.2018

Поделиться ссылкой:

Top