Теве тудо кече толын шуо – 29 ноябрьыште М.Шкетан лӱмеш Марий кугыжаныш драме театр шкенжын шочмо кечыжым палемда. А тенийсе шочмо кечыже тыглай огыл. Марий кундемыште ыштыме икымше Марий театрлан – 100 ий! Тудо икымше, эн кугу ийготан. Тудо моло театр-влакым почаш негыз лийын. Театрым веле огыл, Марий Элысе пӱтынь профессиональный искусствылан тӱҥалтышым налашыже негыз лийын.
Ик курым кутышан корно. Жап тӱрлӧ лийын: 20-шо ийласе шужымо, 30-шо ийласе репрессий, 40-ше ийласе неле сар пагыт. Но театр шке пашажым ик кечыланат чарен шогалтен огыл.
А таче театрыште 100 ияш лӱмгечылан пӧлеклалтше пайрем кас лиеш. Коллективым саламлаш республикысе правительстве , тӱрлӧ организаций ден учрежденийла, театрын пошкудо республикыласе йолташыже-влак толыт.
Эрла, 30 ноябрьыште, артист-влак шке ончышыштым кугу пайрем концерт дене куандарат. Программе пеш поян, тудо тыгак эртыме корным шергалаш йӧным пуа.
Шочмо кечет дене, йӧратыме марий театрна. Пайрем дене артист, театрыште тыршыше чыла пашаеҥ-влак!

Additional information